Komandante UPM, Saudozu Superintendente Lino Saldanha. Imajen/Eugénio Pereira

DILI, 17 Fevereiru 2020 (TATOLI)-Komandante Unidade Polísia Marítima (UPM), Saudozu Lino Saldanha, ohin, haloot ona nu’udar eroi ida ba povu no nasaun ida-ne’e iha Jardín Eroi, Metinaro.

Notísia Relevante : Komandu PNTL Promove Diviza Sentidu Espesiál Ba Saudozu Lino Saldanha

Molok lori bá haloot iha fatin deskansa eterna nian iha Jardín Eroi Metinaro, mate isin Saudozu Lino Saldanha, selebra uluk Misa Requiem ne’ebé partisipa husi amigu, família rasik, parente, no família boot komandu Polísia Nasionál Timor-Leste (PNTL), kompostu husi Komisáriu Faustino da Costa, ho komandante unidade sira, komandante PNTL munisípiu 12, inklui Rejiaun Administrativu Espesiál Oé-Cusse Ambeno (RAEOA).

Komandante Jerál PNTL, Komisáriu Faustino da Costa. Imajen/Eugénio Pereira

Hafoin misa, família sira akompaña mate isin lori bá presta omenajen iha Komité 12 Novembru,  Balide, Dili, hodi kontinua lori bá Kuartél  UPM Marítima hodi presta omenajen ikus ho parede militár.

Komandante Jerál PNTL, Komisáriu Faustino da Costa, hateten to’o agora Komandu PNTL seidauk deside atu ema ruma substitui Saudozu Lino Saldanha nu’udar Komandante UPM hodi hein prosesu tomak kona-ba funerál nian.

Notísia Relevante : Komandu PNTL Sente Lakon Futuru Líder Potensiál Ida

“Ita hein to’o serimónia funerál Saudozu Komandante Lino Saldanha hotu maka ita sei haree prosesu sira atu la’o oinsá,” tenik Komisáriu Faustino da Costa, ba jornalista iha Kuartél Jerál PNTL, Caicoli, Dili.

Nia dehan, atu buka ema foun hodi troka Komandante Lino Saldanha la’ós fásil, tanba haree ba esperiénsia uluk nomea Komandante Lino Saldanha ba UPF mós presiza buka ema di’ak no iha esperiénsia domina área servisu marítima nian no iha koñesimentu natoon ba lei.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here