Saudozu Komandante UPM, Lino Saldanha. Impajen/espesiál

DILI, 14 fevereiru 2020 (TATOLI)- Komandu Polisia Nasionál Timor-Leste (PNTL) koordena ho Governu liu husi Ministériu Interiór hasai ona despaxu ida atu promove Saudozu Komandante Unidade Polisia Marítima (UPM), Superintendente Lino Saldanha ho diviza sentidu (asepsaun) espesiál hodi kontinua tau matan nafatin ba saudozu nia oan na’in hitu.

Notísia Relevante : Komandante UPM Mate Tanba Moras Kardiaku

Komandante Jerál PNTL, Komisáriu Faustino da Costa. Imajen/António Gonçalves

“Instituisaun ninia obrigasaun ida maka sei koordena nafatin ho família hodi haree direitu regalia ba iha nia oan na’in hitu ne’ebé sei eskola. Nune’e mós Komandu depois koordena hamutuk ho Governu Timor-Leste sei halo promosaun ida ba nia ho kargu ho títulu sentidu  (asepsaun) espesiál ba nia,” informa Komandante Jerál PNTL, Komisáriu Polísia Faustino da Costa ba jornalista ohin, iha Kuartél Jerál PNTL Caicoli Dili.

Faustino koñese di’ak Superintendente Lino Saldanha, ema ida ativu tebes dezde PNTL harii iha tinan 2000 too agora  asume mós kargu importante no reprezenta PNTL ba tuir formasaun barak iha rai li’ur too hakotu vida ikus nu’udar komandante UPM.

Notísia Relevante : PNTL Lakon Komandante Di’ak Lino Saldanha

Durante sei moris, Lino Saldanha, la’ós kontribui de’it servisu ba PNTL, maibé nu’udar mós joven loriku asuwa’in ne’ebé luta ho juventude ba rai Timor-Leste nia independénsia.

Komandu PNTL rasik simu ona karta husi Prezidente Komité 12 Novembru,  Gregorio Saldanha, hodi hato’o ona ba Prezidente Komisaun Omenajen hodi  haree prepara prosesu funerál. Maibé  sei hein matebian nian oan feto boot, Lília Winer Pamela Antónia no  Winer Adriano de Jesus da Silva, ne’ebé hahú hala’o viajen husi Portugál mai Timor-Leste.

Biografia Saudozu Lino Saldanha

Lino da. S. Saldanha,  moris iha Dili iha loron 13 Maiu 1970 no kaben ho Eulália Brás Carvalho da Silva   iha oan na’in hitu (7) kompostu husi mane na’in tolu (3) no feto na’in haat (4).

Oan ki’ak sira ne’e mak hanesan Feto boot, Lília Winer Pamela Antónia, Winer Adriano de Jesus da Silva, Lília Arcângela Carvalho da Silva, Antonia Pamela Brás Carvalho da Silva, Joan Nunes Carvalho da Silva, António Carol Winer Junior Carvalho da Silva Saldanha, João Maria da Graça Brás Carvalho da Silva no Amália Mário Brás Carvalho da Silva Saldanha.

Saudozu hetan fiar husi Komandu PNTL tuir Formasaun Kontra Terrorizmu iha Hawai 2015 ho durasaun tempu fulan tolu (3) no formasaun seluk tan iha rai li’ur.

Matebian hahú Eskola Sekundária no Universidade iha Eskola Politéknika Hera Dili no finaliza estudu mestradu (S2) iha Universidade Udayan,a Dempasar-Bali, Indonézia.

Saudozu asume kargu Komandante Unidade Polisia Marítima iha tinan 2010 ne’ebé nomeia husi eis Segundu Komandante Jerál PNTL, Komisáriu Longuinhos Monteiro.

Matebian tama PNTL iha tinan 2000 hetan graduasaun iha Centro Formasaun Polisia (CFP/PNTL) iha loron 27 masu 2000.

Iha loron 12 fevereiru 2000 too 10 janeiru 2001, hetan orden halo estajiu   mós iha Munisípiu Liquiça  no iha fali loron 12 janeiru too 20 maiu 2001 servisu nu’udar polisia forensik.

Iha loron 21 maiu 2001 too 20 setembru 2001, hetan orden kolokasaun servisu polisia intelijénsia, nune’e, iha 20 setembru 2001 too 10 fevereiru 2002, hetan orden kolokasaun iha Gabinete Justisa PNTL.

Iha loron 10 fevereiru 2002 too 10 jullu 2002,  muda fali ba  servisu nu’udar koordenasaun polisia distritál.  Iha loron 1 outubru too 27 marsu  2003, kontinua muda ba Departamentu Planeamentu Estratéjiku  Kuartél Jerál PNT.

Iha loron  22 outubru 2010 tuir despaxu  no 461/CG— PNTL /X/2010 nomeia ba Komandante UPM hodi lidera membru na’in 155 agora aumenta tan 23 ho totál membru  178  ne’ebé koloka ba postu sia (9) hodi halo seguransa iha tasi Batugadé, Atabae, Liquiça, Dili Aeroportu Comoro, Atauro, Lautem, Covalima no Oe-Cusse.

Knaar sira ne’ebé matebian ne’e kontribui ba Instituisaun PNTL la konta ho saudozu nia vida sei joven hodi hamutuk ho juventude lori asuwa’in luta ba Timor-Leste nia independénsia no envolve mós iha organizasaun rezisténsia oin-oin hodi envolve iha saun oioin, inklui partisipa iha manifestasaun  12 novembru 1996 ne’ebé hamosu masakre Santa Krús.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here