Bolseiru timoroan hetan observasaun husi médiku iha Baraka Militár Whangaparaoa. Imajen/Nicodino da Cruz.

DILI, 17 fevereiru 2020 (TATOLI)-Ministru Negósiu Estranjeiru no Kooperasaun (MNEK), Dionísio da Costa Babo Soares, iha semana kotuk dezloka ona ba Nova Zelándia hodi lori fila estudante timoroan na’in-17 mai Timor-Leste hafoin hetan asisténsia hosi Governu Nova-Zelándia hodi evakua hosi sidade Wuhan, Xina, foin lalais.

Diretór Jerál ba Asuntu Konsulár no Protokolár MNEK, Juvencio de Jesus Martins hateten médiku Nasaun Nova Zelándia halo teste ida ba sira no la identifika katak hosi estudante hirak-ne’e la sofre coronavirus, tanba ne’e, iha semana ida ne’e, bolseira hirak-ne’e sei to’o iha Timor-Leste akompaña hosi Ministru Dionísio Babo.

Notísia Relevante :19 Fevereiru, Bolseiru Na’in-17 Sai Husi Barraka Militár Nova Zelándia 

“Atu lori estudante hirak-ne’e mai billete Governu mak tenke hola. Entaun, Ministru Negósiu Estranjeiru no Kooperasaun hetan ona autorizasaun hosi ita-nia Primeiru-Ministru, nia (Dionísio Babo) aranka ona bá Nova Zelándia (NZ) aproveita hato’o agradesimentu ba Governu Nova  Zelándia hafoin lori estudante sira-ne’e mai,” dehan Juvencio de Jesus Martins, ba TATOLI iha Praia dos Coqueiros, Dili, ohin.

Notísia Relevante :Governu TL Hato’o Agradesimentu Ba Governu Nova Zelándia Nia Apoiu

Entretantu, iha semana kotuk, Prezidente Repúblika, Francisco Guterres Lú Olo haruka ona karta ofisiál ida ba Governadór Jerál NZ hodi agradese tanba hatudu ona jestu solidariedade ba estudante sira hodi evakua hosi Sidade Wuhan, Xina, bá Nasaun Nova Zelándia.

Notísia Relevante :Bolseiru Timoroan 17 Agradese Governu TL, Xina no Nova Zelándia

Jornalista : Hortençio Sanches

Editór       : Agapito dos Santos

HAKEREK NO HATÁN

Please enter your comment!
Please enter your name here