Bolseiru timoroan iha Kuarentena, Baraka Militár Whangaparaoa. Imajen/Nicodino da Cruz.

DILI, 07 fevereiru 2020 (TATOLI) – Bolseiru Timoroan na’in-17 hato’o agradesimentu ba Governu Timor-Leste (TL), Xina no Nova Zelándia, tanba halo esforsu tomak hodi evakua sira husi sidade Wuhan, Provínsia Hubei.

“Ami agradese tebes ba Governu Timor-Leste, Governu Nova Zelándia no Governu Xina no embaixadór sira husi nasaun rua  ne’ebé esforsu an no koopera malu hodi evakua ami to’o mai iha Nova Zelándia”, Bolseiru Nicodino da Cruz ne’ebé estudu mestradu iha área Civil Engineering iha China University Of Geosciences-Wuhan ba Ajénsia TATOLI via mídia sosiál, ohin.

Nicodino dehan daudaun ne’e, sira halo teste dala-rua ona atubele hatene iha sintoma ruma kona-ba Coronavirus nian.

Bolseiru timoroan hetan observasaun husi médiku iha Baraka Militár Whangaparaoa. Imajen/Nicodino da Cruz.

“Ami halo ona medically check dala rua no buat hotu la’o normál hela katak timoroan na’in-17 seidauk iha ida mak infetadu ka sintoma husi virus Corona”, Nicodino hatete.

Iha fatin izolamentu ne’e médiku akompaña loron-loron atu hatene karik hetan sintoma (virus Corona) balun ne’ebé dezenvolve sira (médiku) foti asaun lalais.

Hodi dehan sira hetan tratamentu di’ak loos husi Governu Nova Zelándia tanba fó apoia hahán no observasaun husi médiku.

Embaixadór Timor Leste iha Nova Zelándia mós ko’alia ona ho bolseiru sira atu kontinua koopera prosesu izolamentu atu hafasil médiku sira halo observasaun.

“Ami kontinua koopera prosesu izolamentu ne’e to’o semana rua (loron 15) atu hatene loos laiha sintoma Coronavirus ami bele sai husi ne’e bá Timor-Leste”, katak.

Nicodino dehan : “Graça de Deus ami iha kondisaun di’ak hotu, ne’ebé kontinua koopera ho sira atu prosesu ne’e bele la’o di’ak”, afirma.

Estudante timoroan na’in-17 evakua husi sidade Wuhan, Xina, ho aviaun NZ 1942 iha tuku 1:00 madrugada oras Xina nian to’o iha aeroportu Nova Zelándia tuku 6:00 dadeer no kontinua kedan ba kuarentena ka barraka militár Whangaparaoa iha Norte Auckland, Nova Zelándia nian.

Governu Timor-Leste liuhusi Primeiru-Ministru Taur Matan Ruak mós hato’o agradesimentu ba Nova Zelándia ba desizaun hodi simu bolseiru sira ne’ebé mai hosi Wuhan.

Hato’o mós agradese no solidariedade no simpatia ba Governu Xina ba situasaun virus Corona ne’ebé afeta makaas iha nasaun ne’e.

Notísia relevante : Governu TL Hato’o Agradesimentu Ba Governu Nova Zelándia Nia Apoiu

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here