Ohin, Ministériu Negósiu Estranjeiru hamutuk ho Embaixadór Nova Zelandia iha Timor-Leste hala'o enkontru, ita-nia ita-nia Ministru Negósiu Estranjeiru reprezenta Governu Timor-Leste hato'o agradesimentu ba Governu Nova Zelandia. Imajen: Nelia Fernandes

DILI, 06 fevereiru 2020 (TATOLI)-Governu Timor-Leste liuhusi Ministériu Negósiu Estranjeiru no Kooperasaun (MNEK), ohin hala’o enkontru ho Embaixadór Nova Zelándia iha Timor-Leste, hodi hato’o agradesimentu ba Governu Nova Zelándia nia apoiu hodi evakua estudante timoroan na’in 17 husi Provínsia Wuhan.

“Ohin, Ministériu Negósiu Estranjeiru hamutuk ho Embaixadór Nova Zelándia iha Timor-Leste hala’o enkontru, ita-nia ita-nia Ministru Negósiu Estranjeiru reprezenta Governu Timor-Leste hato’o agradesimentu ba Governu Nova Zelándia nia tulun hodi evakua estudante timoroan sira iha Wuhan ne’ebé afetadu ho moras Corona Virus,” Sekretáriu Jerál Ministériu Negósiu Estranjeiru no Kooperasaun, Jorge Trindade Neves Camões dehan, liuhusi Konferénsia Imprensa, ohin.

Nia hatutan, serbisu ne’e serbisu ida ho koordenasaun ne’ebé intensivu tebe-tebes entre Ministériu Negósiu Estranjeiru ho embaxadór Nova Zelándia iha Timor-Leste iha últimu semana ida ka rua nia laran.

“Prosesu koordenasaun ne’e husi Ministru Negósiu Estranjeiru rasik maka envolve koordena buat ne’e. Maibé, ezekuta husi ita-nia Diretór Interinu Joaquim Savio koordena ho embaixadór rasik, halo prosesu koordenasaun husi inísiu to’o ita-nia estudante sira sai husi Wuhan,” nia infroma.

Iha momentu enkontru ne’e, nia dehan, ministru hato’o ona apresiasaun boot tebe-tebes ba Nova Zelándia tanba bele simu Timor-Leste nia proposta atu evakua estudante timoroan sira ho di’ak to’o iha Nova Zelándia.

“Agora sira iha ne’ebá, sira sei iha karantina nia laran durante loron 14 nia laran, atu nune’e haree katak sira di’ak ona mak sira sei fila fali mai iha Timor-Leste,” nia dehan.

Sekretáriu Jerál MNEK ne’e hateten, ohin, loron nasionál Nova Zelandia nian Watang Day, hanesan prezente di’ak ida ne’ebé parte Nova Zelándia oferese ba Timor-Leste.

“Ita hakarak, iha momentu ne’e mós hato’o ita-nia apresiasaun ba kooperasaun di’ak ne’ebé mak Nova Zelándia estende ba ita to’o lori ita-nia estudante sira, hanesan ita-nia riku-soin importante tebe-tebes,” nia hateten.

Nia reforsa, koordenasaun sei kontinua tanba sei iha loron 14 iha ne’ebá to’o ita sei koordena fila fali, oinsá lori fila fali sira mai iha Timór.

Aleinde hato’o agradeseimentu ba Governu Nova Zelándia, nia hatutan, Governu Timor-Leste mós hato’o agradesimentu ba Embaixada Xina iha Timor-Leste ba Estadu Wai Wang ne’ebé koopera ho Timor-Leste atu kuida estudante timoroan sira husi inísiu to’o halo evakuasaun.

“Hodi Governu Timor-Leste nia naran, Ministru Negósiu Estranjeiru no Kooperasaun agradese ba embaixada Xina nian koordenasaun ba embaixada TL iha Xina no autoridade sira seluk iha Xina ne’ebá hodi evakua ita-nia estudante sira mai,” nia dehan.

Iha parte seluk, Embaixadór Nova Zelándia iha Timor-Leste, Philip Hewitt hateten, Governu Nova Zelándia kontente tebe-tebes atu asiste estudante timoroan sira ne’ebé iha Sidade Wuhan, ne’ebé afetadu Corona Virus atu bele to’o iha Nova Zelándia.

“Nova Zelándia ho Timor-Leste iha kooperasaun bilaterál ida ne’ebé di’ak tebes iha área oin-oin no halo Nova Zelandia mós sente orgullu tebes no iha hakarak atu ajuda timoroan sira ne’ebé iha Sidade Wuhan evakua ba Nova Zelándia,” nia hateten.

Iha parte seluk, Embaixadór Nova Zelándia iha Timor-Leste ne’e mós haraik aan hodi simu agradesimentu tomak ne’ebé mai husi estudante sira-nia família no husi parte hothotu iha Timor-Leste ba Nova Zelándia.

“Ida ne’e mak dehan amigu tanba liuhusi ne’e ita bele presiza atu ajuda malu iha kualker tempu,” nia hateten.

Entretantu, iha biban ne’e, Ministru Negósiu Estranjeiru Timor-Leste, ohin, entrega ona karta agradesimentu ba Governu Nova Zelándia liuhusi Embaixadór Nova Zelándia iha Timor-Leste, Philip Hewitt.

“Iha karta agradesimentu ne’e nia laran, Governu Timor-Leste hato’o apresiasaun no agradesimentu ba Governu Nova Zelándia ninia envolvimentu lori estudante timoroan na’in 17 sai husi Sidade Wuhan no agora daudaun hela iha Nova Zelándia,” nia esplika.

Notísia relevante:Ohin, Estudante Na’in 17 Evakua Ona Husi Sidade Wuhan

Jornalista : Nelia Fernandes

Editór       : Rafy Belo

1 KOMENTÁRIU

  1. Apresia ou terharu tebes ho Governo Nova Zelandia nia ajuda nebe konsege evakua estudante timor sira iha cidade Wuhan. Guvernu TL halo koordenasaun nebe diak tebes…… Abracos….

HAKEREK NO HATÁN

Please enter your comment!
Please enter your name here