Komandante UPM, Superintendente Lino Saldanha. Imajen/Eugénio Pereira

DILI, 12 fevereiru 2020 (TATOLI)- Família boot Komandu Polisia Nasionál Timor-Leste (PNTL), ohin, lakon membru di’ak ida, Komandante Unidade Polisia Marítima (UPM) Superintendente, Lino Saldanha, ne’ebé hakotu iis tanba sofre atake korasaun iha ninia rezidénsia Faról, Dili.

Notísia Relevante : Lia Menon husi Lino Saldanha ba Oan Sira: “Eskola, Estuda Di’ak, Imi Sei Sai Ema Di’ak” 

Komandante Jerál PNTL , Komisáriu Faustino da Costa, sente hakfodak bainhira hala’o hela enkontru ho Prezidente Repúblika, Francisco Guterres Lú Olo, derrepente simu kontaktu katak, Komandante Lino Saldanha, hakotu ona iis iha Ospitál Nasionál Guido Valadares (HNGV).

“Ami la imajina buat ne’e mosu. Ami sente lakon ami nia komandante, ami nia superiór ida, Komandante Unidade Polisia Marítima,” hateten Komisáriu Polisia, Faustino da Costa ba jornalista sira.

Komandante PNTL ne’e fó ona orientasaun ba komandante unidade sira hodi koordena ho família hodi halo preparasaun no hein desizaun governu no Komandu PNTL hodi bele hasai desizaun ruma, molok hala’o serimónia funerál.

“Ami mós triste lideransa ida di’ak ne’ebé potensiál boot ba lider futuru PNTL nian,” tenik Komisáriu Faustino da Costa.

Mate Restu Masakre Santa Krús, 12 Novembru 1991, Lino Saldanha, mate husik hela feen kaben Eulália Brás Carvalho da Silva  ho oan na’in hitu (7) kompostu husi mane  na’in tolu (3) no feto na’in haat (4).

Tuir observasaun Ajénsia TATOLI  nota iha matebian nia uma Faról Dili, hahú hetan vizita husi komandante PNTL, F-FDTL, inklui família no juventude loriku asuwa’in.

Membru Unidade Polisia Marítima koordena ho família sira mós hahú harii ona tenda inklui hala’o preparasaun foru meza no aruma kadeira iha matebian nia uma.

Notísia Relevante : Komandante UPM Mate Tanba Moras Kardiaku

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here