Komandante UPM Superintendente Lino Saldanha. Imajen/Eugénio Pereira

DILI, 13 fevereiru 2020 (TATOLI)- Minutu ikus, molok atu taka matan no dada iis ba dala ikus nian, Komandante Unidade Polisia Marítima (UPM), Superintendente Lino Saldanha, lia tuun hela ba oan sira atu eskola, estuda didi’ak atu imi sei sai di’ak.

Notísia Relevante : Komandante UPM Mate Tanba Moras Kardiaku

Matebian Lino Saldanha, ne’ebé hakotu iis, ohin, iha Ospitál Nasional Guido Valadares (HNGV),  tranzmite hela mensajen ikus ne’e ba nia oan mane, António Carol Winer Júnior Carvalho da Silva Saldanha, bainhira hala’o hela atividade jinástika iha nia uma oin iha Motaél, Dili.

“Ohin dadeer molok ami ba eskola, papa sei bolu ami hodi dehan, ba eskola, estuda didi’ak, para aban bainrua imi sai ema di’ak,” hateten oan mane ba da-haat, António Carol W. Junior Carvalho da Silva Saldanha ba família sira.

Hafoin tranzmite mensajen ne’e, Mate Restu Juventude Loriku Asuwa’in 12 Novembru 1991, Lino Saldanha sei kontinua halo atividade jinástika iha ninia uma oin, nune’e derrepente moras makas iha hirus matan hodi bolu nia kaben Eulália Brás Carvalho da Silva, ho nia oan feto ida no viziñu balun hodi ba bolu madre sira iha Klínika Motaél lori karreta ambulánsia tula ba kedas HNGV.

António Carol hatutan, iha semana hirak nia laran, matebian sei iha kondisaun di’ak no kontinua tama servisu hanesan baibain. Iha kuarta kalan (12/02/2020), molok han kalan sira família hotu sei tuur no reza hamutuk.

“Horisehik dadeer too kalan papa di’ak hela, hodi kalan mós ami hotu sei tuur ho mama reza hamutuk depois mak ami toba. Ohin dadeer, papa sei hadeer fanun ami hotu hariis hodi prepara matabixu hamutuk iha meza molok ba eskola, no papa mós sei halo ezersísiu iha uma oin di’ak hela,” António Carol hateten.

Tuir informasaun ne’ebé Ajénsia TATOLI rekolla husi família katak, matebian hahú sofre moras korasaun iha tinan 2010, bainhira halo vizita servisu ba Japaun maka han supermi manas hodi halo moras ne’e ataka iha momentu ne’ebá. Nune’e, matebian fila fali mai Timor-Leste hodi husu ba hala’o tratamentu saúde iha ospitál Austrália no Portugál konsege rekupera nia saúde.

Iha fatin hanesan, viziñu balun ne’ebé lakohi temi identidade haktuir katak, matebian dadeer ne’e halo hela atividade jinástika maka derrepente moras ataka no monu  kedas ninia varanda oin purvolta tuku 7:00 dadeer.

Daudaun ne’e matebian nian oan feto Lília Winer Pamela Antónia ho Winer Adriano de Jesus da Silva, hala’o hela estudu iha Portugál.

Matebian mate husik hela feen kaben, Eulália Brás Carvalho da Silva  ho oan na’in hitu (7) kompostu husi mane na’in tolu (3) no  feto na’in haat (4).

Oan ki’ak hirak ne’e mak hanesan  Lília Winer Pamela Antónia, Winer Adriano de Jesus da Silva, Lília Arcângela Carvalho da Silva, Antonia Pamela Brás Carvalho da Silva, Joan Nunes Carvalho da Silva, António Carol Winer Junior Carvalho da Silva Saldanha, João Maria da Graça Brás Carvalho da Silva ho Amália Mário Brás Carvalho da Silva Saldanha.

Jornalista : Eugénio Pereira

Editór       : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here