Formasaun ba ba membru VPU munisípiu 12 no RAEOA. Imajen/PNTL

DILI, 12 fevereiru 2020 (TATOLI)- Timor- Leste Police Development Program (TLPDP) Austrália koopera ho Komandu Polisia Nasionál Timor-Leste (PNTL) liu husi Servisu Investigasaun Kriminál Nasionál (SIKN) Seksaun Unidade Ema Vulneravel (Vulneravel Person Unit-VPU) realiza semináriu hodi apoiu formasaun ba membru investigadór sira hodi hasa’e sira nia koñesimentu atu prevene no kombate krime violénsia doméstika iha Timor-Leste.

Notísia Relevante : VPU Rejista Kazu Violénsia Doméstika 128

TLPDP konsidera kombate violénsia doméstika tenke liu husi edukasaun ba sidadaun sira tanba ho edukasaun mak bele diminui violénsia doméstika ne’ebé  akontese makas iha Timor-Leste.

Diretór Investigasaun Kriminál Nasionál, Superintendente Xefe, Henrique da Costa, akompaña husi Komandante TLPDP, Geof Turner, ohin, iha salaun enkontru LPDP, Hudi-Laran, Dili, halo abertura ba formasaun refere ne’ebé partisipa husi Xefe VPU munisípiu 12 ho Rejiaun Administrativu Espesiál Oe-Cusse Ambeno (RAEOA), parseiru Fundasaun Ázia,  ALFELA no reprezentante Sekretáriu Estadu Igualdade no  Inkluzaun (SEII).

Notísia Relevante : SEII ho Sosiedade Sivíl Fó Advokasia Ba Kombate Violénsia Doméstika

Diretór SIKN, Henrique da Costa dehan, formasaun ne’e envolve membru polisia VPU hotu- hotu hodi aumenta sira nia koñesimentu hodi bele halo atendimentu ba kazu krime violénsia doméstika.

Tuir dadus estatístika ne’ebé VPU rejista durante tinan 2019 iha Dili krime violénsia doméstika rejista ho númeru 128.

“Ami  rejistu kazu violasaun doméstika   aas liu iha Dili, segundu Baucau no Oe-Cusse,” hateten Henrique ba jornalista.

Nia dehan, liu husi formasaun ne’e  koopera ho parseiru sira hodi haree oinsá servisu hamutuk hodi atende no fó asisténsia ba vítima violénsia bazeia ba jéneru.

Notísia Relevante : Violénsia Bazeia ba Jéneru iha TL Porsentu 38

Foto hamutuk formandu VPU ho formador sira TLPDP. Imajen/PNTL

Tuir nia haree katak, kazu violénsia doméstika ne’ebé aas maka PNTL halo prevensaun liu husi sensibilizasaun no sosializasaun ba estudante  nivel sekundáriu no universitáriu no komunidade sira. Servisu ida ne’e envolve Ofisiál Polisia Suku  (OPS) sira iha suku para sira nia atividade hanesan patrulla no vizita ba komunidade sira hato’o informasaun ba komunidade sira atu hatene katak violénsia doméstika presiza ema hotu atu halo prevensaun.

Iha fatin hanesan, Konselleira Investigasaun Pesoál Vulneravel no Krime Jéneru (TLPDP), Leesa Alexander dehan, TLPDP apresia tebes bele suporta PNTL.

“Ami iha kometimentu hodi suporta PNTL atu halo investigasaun ba kazu violénsia doméstika tanba kazu ne’e afeta ema barak,” dehan Leesa.

Nia husu ba membru no Xefe VPU munisípiu sira atu hamutuk ho parseiru hodi haree hamutuk oinsá parseiru sira suporta liután VPU hodi fó asisténsia ba vítima sira no oinsá prosesa autór sira tuir dalan legál.

Nia dehan, VPU nia knaar importante tebes hodi simu kualkér keixa husi sosiedade sira hodi bele apoiu vítima sira buka solusaun rezolve problema ne’ebé sira hasoru.

Iha parte hanesan, Koordenadór Programa PRADET, Luisa Marçal dehan, PRADET sempre halo kolaborasaun servisu ne’ebé di’ak ho VPU tanba PRADET kobre ona munisípiu hotu entaun sira halo servisu ida ne’e integradu hodi fó asisténsia ba vítima sira.

Tuir Luisa, atu kombate krime violénsia doméstika presiza sosiedade hotu-hotu nia suporta hodi bele sosializa informasaun atu prevene kazu ne’e iha sosiedade nia leet.

“Ita hotu presiza servisu hamutuk la’ós de’it Polisia no PRADET maibé komunidade no instituisaun sira ne’ebé servisu iha isu violénsia bazeia ba jéneru presiza servisu hamutuk hodi diminui krime violénsia doméstika tanba ita haree oras ne’e daudaun kazu violénsia doméstika aas tebes, tenik nia.

Iha loron 6 marsu 2019, PNTL hetan apoiu husi parseiru TLPDP realiza programa marxa ba dame ne’ebé envolve estudante no sosiedade sira hodi hasa’e koñesimentu públiku atu hatene kona-ba saida mak violénsia doméstika no violénsia doméstika nu’udar krime públiku.

PNTL rasik lansa ona lansa livru ki’ik ida kona-ba violénsia doméstika hodi fahe membru PNTL sira hatene sira nia kna’ar no iha koñesimentu bainhira atende ba kazu violénsia doméstika husi vítima sira.

PNTL mós koopera ho TLPDP no Organizasaun Naun Governamentál sira ne’ebé suporta vítima sira ne’ebé hasoru kazu violénsia doméstika hodi hela iha uma mahon, suporta médiku, suporta forensik, suporta legál ba konsellu psikolojia ba vítima hodi rekupera sira nia mentál.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here