Sekretária Estadu Igualdade no Inklusaun, Maria José da Fonseca Monteiro de Jesus. Imajen/ António Goncalves

DILI, 09 jullu 2019 (TATOLI)-Sekretaria Estadu Igualdade Jéneru no Inkluzaun (SEII) serbisu hamutuk ho parseiru dezenvolvimentu no sosiedade sivíl, hodi halo advokasia ba kombate ba violénsia doméstika no jéneru.

Sekretária Estadu Igualdade Jéneru no Inkluzaun (SEII), Maria José da Fonseca Monteiro de Jesus, hateten, esforsu advokasia ne’ebé halo mak sosializa violénsia doméstika ne’ebé  tau ona katak violénsia ne’e krime públiku, tanba ne’e vitima ka sasin ou ema sé de’it hatene tenke hato’o keixa ba autoridade lokál no mós polisia.

SEII ho parseiru sira mós kontinua serbisu nafatin atu halo sosializasaun ba prevensaun no kombate violénsia doméstika liuhusi semináriu  no fahe informasaun ba komunidade no mós iha eskola sira iha territóriu.

“Ami mós serbisu hamutuk ho Polisia Nasionál Timor Leste (PNTL), setór judisiáriu atu fó hanoin ba malu no fahe informasaun, oinsá mak instituisaun hirak ne’e bele atende bainhira hasoru kazu violénsia doméstika no ba feto sira,” hateten SEII, Maria José da Fonseca Monteiro de Jesus ba Ajénsia TATOLI, foin lalais ne’e, iha Palásiu  Governu.

Nia hatutan, programa prinsipál ida ba governu ne’e  oinsá  halo prevensaun ou kombate ba violénsia doméstiku no jéneru.

“Ami mós iha programa empoderamentu ba feto iha área ekonómika, empoderamentu ba feto iha área polítika no mós programa abordajen jéneru katak ita halo advokasia ba instituisaun governu hotu atu asegura katak sira hamosu polítika, tau programa i kria programa no mós aloka orsamentu ba promosaun igualdade no empoderamentu feto nian,” hateten Maria José da Fonseca Monteiro de Jesus.

Liuhusi programa hirak ne’e, esplika SEII Maria José da Fonseca Monteiro de Jesus,  bele asegura nafatin katak, instituisaun hotu estadu nian no mós sosiedade sivíl ho parseiru dezenvolvimentu, hamutuk halo esforsu oioin atu bele asegura polítika no orsamentu hodi halo serbisu ba promosaun jéneru nian hodi halo empoderamentu ba feto.

Em termu infraestrutura nian, SEII kontinua halo advokasia ho Ministériu Obras Públika (MOP) atu haree no asegura katak investimentu  infraestrutura publika bele asegura mós sensibilidade jéneru, labarik feto sira no ba ema ho defisiénsia sira.

Jornalista          : Osória A. Marques

Editór                : Francisco Simões

HAKEREK NO HATÁN

Please enter your comment!
Please enter your name here