Xefe VPU Nasionál, Inspetór Ricardo da Costa

DILI, 23 jullu 2019 (TATOLI)- Hahú husi  inísiu janeiru to’o jullu, tinan ne’e, Diresaun Vulneravel Person Unit (VPU) Polísia Nasionál Timor-Leste (PNTL) rejista kazu violénsia doméstika hamutuk 128.

Xefe VPU Nasionál, Inspetór Ricardo da Costa, informa, violénsia akontese kauza mai husi problema feen no la’en utiliza média sosiál Facebook no WhatsApp la fó sai segredu  konversa iha média sosiál too ikus mosu problema iha uma.

 “Kazu sira agora daudaun númeru aas ne’e uza média sosiál. Dala-barak ita livremente uza handphone  di’ak sira ne’e hodi asesu ba informasaun iha rede sosiál. Maibé, balun uza sala bele impaktu ba sira,” hateten Inspetór Ricardo.

Bainhira sai oradór iha kampaña no sosializasaun prevensaun krime ne’ebé organiza husi Departamentu Polisiamentu Komunitáriu Nasionál (DPKN) ba Juventude no Komunidade sira iha Jardín 5 de Maio, Colmera,  sesta (19/07/2019), Inspetór Ricardo, esklarese, dala-ruma feen ou la’en halo komunikasaun ho ema ruma depois la halo tiha ninia servisu iha uma laran tomak bele hamosu mal entendimentu no konflitu uma laran.

Inspetór Ricardo esplika dala ruma feen no la’en utiliza sala média sosiál, Facebook la’o tiha ona, mais sei nafatin husu númeru WhatsApp (WA) husi kolega ho intensaun sira ne’e sira komesa lori malu ona ba hamosu krime violénsia doméstika no violénsia seksuál.

 “Tanba ne’e maka husi parte VPU rasik halo ona programa ida “Prevene Sedu” ho nia atividade ko’alia kona-ba Think You Know, Saida Maka Ita Haree iha Telefone Laran, Saida maka Ita Ko’alia ba Malu no Saida maka Ita Halo, tanba ne’e programa ne’e iha loron 24 fulan Maiu 2019 liu ba, lansa ona husi Ministra Edukasaun no Komandante Jerál hodi hala’o programa ne’e iha Eskola Sekundária Munisípiu sira hotu,” Inspetór Ricardo tenik.

Nia esplika, sosializasaun ne’e foka ba iha estudante sira ne’ebé iha eskola sekundária, hodi hasa’e sira nia koñesimentu, tanba estudante sira ne’e maioria ho idade ne’ebé produtivu, bainhira sira akaba ou finaliza sira nia estudu, balun forma uma kain, sira bele iha ona koñesimentu kona-ba lei kontra violénsia doméstika.

Nune’e aban bain-rua sira iha oan, sira bele hatutan informasaun ida ne’e ba sira nia oan, entaun ba tinan 10 oin mai, iha sosiedade nia leet labele ko’alia beibeik ona krime violénsia doméstika.

Diretór Departamentu Polisiamentu Komunitáriu Nasionál (DPKN),  Superintendente Asistente António da Luz dehan, kampaña prevensaun krime nian ba joven no komunidade iha sidade Dili  importante tebes hodi redús krime iha rai laran.

António hatutan liuhusi atividade ne’e bele muda komunidade nia hanoin kria dame iha família no sosiedade.

Entretantu programa partisipa mós husi tránzitu, investigasaun no Gabinete Apoiu Jurídiku PNTL hodi fahe mós informasaun kona-ba kódigu estrada nian, VPU (Vulnerable Person Unit) problema violénsia doméstika no mós ba iha Lei Nu. 5/2017 kona-ba arma branka no arte marsiál nian.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here