Igreja Katólika kontinua apela oinsá sosiedade Timor-Leste atu kuidadu no labele soe bebé. Meius sosializasaun Igreja nian ne'e monta espanduk iha edifísiu Komisaun Justisa no Pás, Igreja Katedrál Dili. Imajen/Eugénio Pereira

DILI, 12 fevereiru 2020 (TATOLI)- Diretór Servisu Investigasaun Kriminál Nasionál, (SIKN) Superintendente Xefe, Henrique da Costa rekoñese,  ekipa SIKN susar atu identifika autór sira ne’ebé kontinua soe bebé iha kapitál Dili.

Notísia Relevante : Polisia Investiga Hela Kazu Soe Bebé iha Fomento III

Diretór SIKN Superintendente Xefe, Henrique da Costa. Imajen/Eugénio Pereira

Henrique da Costa, informa kestaun ne’e relasiona ho  kazu soe bebé ne’ebé akontese iha área Fomento, Dili, foin lalais ne’e, inklui mós kazu soe bebé  ne’ebé akontese iha Dili laran.

Mezmu hetan difikuldade, maibé parte PNTL halo investigasaun no kontinua koopera nafatin ho autoridade sira buka nafatin paradeiru autór  sira.

Tuir nia katak, kazu soe bebé iha Delta, polisia halo ona investigasaun hodi rekolla dadus husi sasin sira, maibé la konsege identifika autór sira, tanba parte polisia deskonfia autór sira ne’ebé soe tiha bebé muda sira nia hela fatin ba mai Dili laran too muda ba hela munisípiu sira.

Notísia Relevante : PDHJ Prepara Ona Pareser Prevene Soe Bebé

“Ita la identifika autór sira, tanba ita hatene katak la’ós ekipamentu mak laiha, maibé presiza servisu hamutuk di’ak liután ho Konsellu Polisiamentu Komunitáriu (KPK), Ofisiál Polisia Suku (OPS) inklui autoridade lokál la identifika ema (autór) nia hela iha Dili sira hela la permanente,” dehan Superintendente Xefe, Henrique ba jornalista, ohin, iha salaun enkontru TLPDP, Hudi-Laran Dili.

Tuir nia haree katak, kazu soe bebé akontese makas iha Dili, tanba joven sira moris ransu livre no lakon kontrolu morál husi inan-aman. Balun fali, tuir nia, tanba simu influénsia husi teknolojia iha era dijitál.

Notísia Relevante : Família Xave Importante Halakon Kazu Soe Bebé

Iha fatin hanesan, Koordenadór Programa ONG PRADET, Luisa Marçal dehan, sira rasik preokupa bainhira haree kazu soe bebé akontese makas iha Dili.

Atu evita kazu sira ne’e, tuir nia hanoin, inan-aman sira presiza halo kontrolu makas ba sira nia oan feto no mane atu evita moris ransu livre hodi fó impaktu ba buat ne’ebé tuir loloos la merese atu halo.

PRADET rasik mós durante ne’e servisu ho ONG barak hodi sosializa informasaun ba povu sira, oinsá halo kontrolu hamutuk hodi evita problema ema soe bebé.

Notísia Relevante : PR Lú Olo: Justisa Tenke Sériu Julga Kazu Soe Bebé

Jornalista : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here