Provedora Direitu Umanu no Justisa, Jesuina Maria Ferreira Gomes. Imajen Tatoli/ Egas Cristóvão

DILI, 12 dezembru 2019 (TATOLI)–Provedora Direitu Umanu no Justisa, Jesuina Maria Ferreira Gomes, hateten sira-nia parte prepara ona pareser ida kona-ba asuntu soe bebé hodi haruka ba Parlamentu Nasionál no Governu atu haree.

“Iha pareser Provedoria Direitu Umanu no Justisa (PDHJ-sigla Portugés) nian ne’e ho títulu obrigasaun Estadu atu halo protesaun ba iha bebé sira-nia moris no sira-nia inan. Objetivu prinsipál hosi pareser ne’e atu fó hanoin ba iha parte relevante liuliu Parlamentu Nasionál ho Governu oinsá sira atu kria mekanizmu no sistema ida-ne’ebé efikás hodi prevene problema soe bebé iha nasaun ne’e,” Jesuina dehan iha salaun Lalini Larigutu Komisaun Nasionál Eleisaun (CNE-sigla Portugés), Caicoli, Dili, kinta ne’e.

Lee mós: GMPTL Buka Solusaun ba Problema Soe Bebé

Nia dehan, atu halo prevensaun sériu devér Estadu nian atu halo liuhosi serbisu ne’ebé Governu halo.

“Iha sujestaun ba iha parte lubun ida iha ami-nia pareser ne’e. Ida ba Ministériu Solidariedade Sosiál no Inkluzaun, ba Ministériu Edukasaun, Ministériu Saúde, Ministériu Reforma Lejizlativa no Asuntu Parlamentár no Parlamentu Nasionál rasik. Ami atu husu medida saida mak sira tenke halo. Primeiru, iha parte lejizlasaun sira halo planu ba iha kriansa hahú hosi 2016 ba to’o 2020 iha polítika lubuk ida-ne’ebé mak seidauk públika iha Jornál Repúblika. Entaun, ida-ne’e ami husu Parlamentu atu halo fiskalizasaun ba kestaun ne’e,” nia dehan.

“Hosi dadus ne’ebé ita hetan maioria joven sira hahú hosi idade 15-19 tama ona ba iha relasaun sexuál. Nune’e mak sira tenke hetan informasaun para bele seguru hodi labele grávida. Ida-ne’e mak iha pareser ne’ebé mak ami sei hato’o ba Governu no Parlamentu,” nia akresenta.

Jesuina informa, iha pareser ne’e ko’alia mós katak públiku labele kondena de’it inan ne’ebé soe bebé maibé tenke haree oinsá Estadu bele halo prevensaun para inan hirak-ne’e labele soe bebé.

“Meiu di’ak ne’ebé Estadu atu halo di’ak liu mak kria kampaña ba iha komunidade ne’ebé iha situasaun difísil. Sira iha situasaun difísil tanba dalaruma balun família lakohi simu entaun sira deside halo nune’e entaun ida-ne’e presiza atu haree. Governu tenke kria fatin balun atu nune’e inan-feton sira monu ba iha situasaun difísil sira nune’e sira labele soe de’it bebé maibé sira bele ba iha fatin ne’ebé Governu kria ona,” ema númeru ida iha PDHJ ne’e haklaken.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here