DILI, 08 fevereiru 2020 (TATOLI)-Asosiasaun Jornalista Timor Lorosa’e (AJTL) liuhusi kongresu ba da-haat eleje Zevonia Vieira, nu’udar lider másimu hodi prezide AJTL ba périodu tinan haat, 2020-2024.

Zevonia Viera konkorre iha atividade sufrajiu universál, liuhusi aprezentasaun pakote. Pakote sira ne’ebé mak konkorre iha eleisaun estrutura AJTL kompostu husi Pakote A, B no C.

Bainhira eleisaun hotu ne’ebé la’o iha ambiente no euforia ida demokrátiku, iha apuramentu rezultadu finál, pronunsia katak Zevonia Viera eleitu nu’udar prezidente AJTL ho mandatu tinan haat. Katak, pakote A hetan votus neen, Pakote B hetan votus 81 no Pakote C ho votus 80. Nune’e, Zevonia Viera, nu’udar kandidatu feto ida iha Kongresu no eleisaun estrutura AJTL husi pakote B mak hetan votus maioria kompara ho “adversáriu” rua, pakote A no C.

Prezidente Eleitu AJTL, Zevonia Viera hateten, sai hanesan prezidente ne’e hanesan naha boot ida tanba atu haree funsaun ida iha Timor-Leste hanesan vizaun ida luta nafatin ba iha liberdade imprensa no mós liberdade espresaun, nu’udar vizaun boot AJTL nian.

Ho ezijénsia husi jornalista ne’ebé mak barak asosia katak atu halo formasaun barak prepara jornalista ne’ebé mak di’ak no sai ponte ne’ebé mak diak ba ita-nia sosiedade ho halis lialos no justisa.

“Entaun ida ne’e mak sai vizaun AJTL katak ema ne’ebé mak lian la iha no oinsá mak sai jornalista diak,” Prezidente AJTL Zevonia Veira ba jornalista sira banhira ramata votasaun ba estrutura foun iha estúdio São Miguel Arcanjo, Tvet, Raikotu, Dili, ohin.

Iha fatin hanesan, konkorrente husi Pakote C, Amito Araújo ba jornalista sira katak atu sai jornalista di’ak, labele fó sai informasaun ne’ebé mak laloos; haree de’it tempu agora, era globalizasaun, agora ema barak mak halo informasaun falsa.

Tanba ne’e mak naha ida, responsabilidade AJTL presiza halo iha périodu ida ne’e atu nune’e forma jornalista atu fó sai informasaun tuir koridór jornalista nian ho kódigu jornalista nian.

Nune’e luta nafatin liberdade imprensa no espresaun no mós la’ós ida ne’e deit maibé fó mós espasu ba estajiadu sira no ba estudante kominikasaun sosiál katak labele lakon oportunidade no aprende kona-ba mundu jornalizmu nian atu nune’e sira mós prepara sira nia an banhira sai jornalista no sira bele ona no atu sai ponte ona ba sira-nia sosiedade sira no mós audénsia.

“Ida ne’e mak ha’u-nia hanoin. Ida ne’e hanesan kompetisaun demokrasia iha AJTL nia laran mak objetivu dahuluk mak pakote C lakon ida ne’e la’ós ita hadook an iha asosisaun ne’e lae,” Prezidente Pakote C ne’e kompromete.

Maibé, tuir nia, ita nafatin kontribui para hadi’a liután asosisaun no programa sira ne’ebé   mak iha preokupasaun husi jornalista balun no ita hamutuk hodi kontribui no ita kolabora hamutuk nafatin ho kolega sira ne’ebé mak pasa iha votasaun ne’e no ida ne’e la’ós oportunidade ba sira maibé ida ne’e hanesan responsabilidade ba sira atu responsabilidade ba estrutura no responsabilidade ba membru hotu iha AJTL.

“Tanba ne’e mak ba oin, ami sei servisu hamutuk nafatin para labele mosu preokupasaun tanba ne’e mak ita sei hamutuk hodi hadi’a AJTL ne’e ba futuru”.

Notísia relevante:AJTL-TLPU Presiza Fó Formasaun Espesífika No Avansada Ba Jornalista

Nune’e mós, Prezidente AJTL sesante, périodu 2015, David hugo hateten, liuhusi biban ne’e husu nafatin prezidente eleitu katak AJTL sai nafatin hanesan mahon ba jornalista hothotu no sai nafatin fatin halibur jornalista sira no mantein nafatin imparsialidade, independente; kualker atividade labele introdus aan iha grupu oioin iha AJTL nia atividade tomak.

“Husu mós estrutura foun atu hadi’a buat balun ne’ebé mak iha ami nia mandatu ami la konsege halo, la konsegue hadi’a estututu ne’ebé mak ita diskute iha kongresu nia laran no husu para estrutura foun atu hadi’a ida ne’e,” prezidente sesante AJTL husu tan.

Kompozisaun estrutura AJTL 2020-2024

Estrutura kuadru AJTL ba périodu 2020-2024 kompostu husi Prezidente Zevonia Viera husi Tafara, Vise-Prezidente Aniceto dos Reis husi RTTL,Ep, Sekretáriu Jerál mak Alberico Junior, Vise-Sekretáriu Jerál I mak Bela Corte Real husi RTTL, Ep, Vise-Sekretáriu Jerál II mak Acacio Pinto husi Timor Post.

Tuir mai, Alia da silva nu’udar Finansas, Sekretáriu Órgaun Ezekutivu, Aveiro Ximenes husi RTTL.Ep, Sekretáriu Kuadru Rita Almeida husi Tatoli.Ip-Ajénsia informasaun ofisiál estadu Timor-Leste, Prezidente konsellu Fiskál mak David Hugo, Prezidente Konsellu Étika mak Virgílio Guterres.

Xefe Departamentu Kapasitasaun no Treinamentu mak Maria Bibel, Xefe Departamentu Peskiza no Planeamentu mak Efrem Guterres no Xefe Departamentu Balibo V mak Jeki das Neves, Xefe Departamentu Multimedia mak Jonio Soares no Flamo Soares, Xefe Departamentu Relasaun Esterna mak António Febo husi Timor News.

Enkuantu, estrutura asembleia AJTL ba périodu 2020-2024 mak reprezenta husi Fundadór AJTL,  Zesopol Caminha, reprezentante eis-titulár mak Gil Julio da Silva Guterres, representante Televizaun, Armindo Crisna Caetano,  reprezentante media imprime mak Carlos Malilaca, reprezentante Rádiu mak Emilia Correia (RTTL) no Julião Andrade (Radio Komunidade Aileu), Reprezentante media Online mak Cancio Ximenes.

Notísia relevante:AJTL Halo Konferénsia Dahaat Hili Estrutura Foun 2020-2024

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here