Sekretáriu Estadu Komunikasaun Sosiál, Merício Juvinal dos Reis 'Akara'. Imajen Tatoli/António Gonçalves

DILI, 07 janeiru 2020 (TATOLI)- Sekretáriu Estadu Komunikasaun Sosiál (SEKOMS), Merício Juvinal dos Reis “Akara” hateten, AJTL (Asosiasaun Jornalista Timor-Leste) no TLPU (Timor-Leste Press Union) presiza fó formasaun espesífika no avansada ba jornalista sira hodi hadi’a kualidade jornalizmu.

Tuir SEKOMS katak governu ne’ebé de’it maka iha tenke serbisu no halo polítika bazeia ba liafuan save rua ne’ebé maka hakerek ona iha baze legál katak Garantia Liberdade ba espresaun no direitu atu hetan informasaun ne’ebé loloos nu’udar direitu fundamentál ba ema hotu no xave rua informasaun ne’ebé loloos hodi  bele garantia direitu fundamentál sidadaun nian aleinde reforsa mós hosi lei komunikasaun sosiál.

“Bazeia ba ida ne’e ita define ita- nia politíka, VIII Governu Konstitusionál deside  atu kontinua apoiu, haforte ita -nia media públiku no privadu inklui asosiasaun jornalista sira.   Maibé hanoin katak politika ne’e lato’o nune’e presija polítika fiskál, nune’e governu hanoin tenke aloka fundu atu apoiu direta no indireta ba media estadu, no ida ne’e maka sai mós nu’udar planu asaun ne’ebé maka VIII Governu Konstitusional iha,” Sekretáriu Estadu Merício Akara hateten, iha abertura konferénsia AJTL, iha Raikotu, Comoro, ohin.

Governante ne’e mós haklaken, iha asaun barak maka konsege realiza hanesan kapasitasaun  rekursu umanu.“SEKOMS  liuhosi CEFTEC  serbisu hamutuk ho Instituto Camões fó formasaun kona-ba língua portugeza ba media sira”.

Iha biban hanesan, nia haktuir, presiza iha mós komunikasaun ho parte relevante sira hanesan AJTL no TLPU atu governu bele intende didi’ak planu no programa prioridade atu nune’e fasil ba governu hodi apoiu liliu iha parte téknika nian.

“Iha planu asaun ne’e  ami hakarak hala’o no presiza iha komunikasaun nune’e ita-bo’ot sira-nia kontribuisaun, planu no  prioridade governu bele asesu, uainhira governu entende didi’ak planu hotu, fasil atu  apoiu ba parte tékniku; ne’ebé polítika laiha problema,” nia hateten.

Relasiona ho polítika ne’e, Governante ne’e dezafia asosiasaun rua hanesan AJTL no TLPU atu fó informasaun ida ne’ebé espesífika no avansada tanba governu sei kestiona ho kualidade media iha rai laran.

“Entaun ida ne’e maka asaun ne’ebé ami halo ona. Ami husu para kontribui  maka’as ba informasaun ne’ebé  espesifíku liu,  no avansadu liu tanba  infromasaun ne’ebé  báziku ita halo barak ona no uainhira aprezenta proposta Komisaun D kestiona kona-ba kualidade media” haktuir Governante ne’e.

Tanba ne’e, Sekretáriu Estadu, Merício Akara garante katak governu sei tau orsamentu hodi fasilita formasaun ba jornalista sira iha rai li’ur.

Notísia relevante:AJTL Halo Konferénsia Dahaat Hili Estrutura Foun 2020-2024

Jornalista: Nelia Borges

Editór       : Rafy Belo

HAKEREK NO HATÁN

Please enter your comment!
Please enter your name here