Konferénsia Imprensa husi eis-traballadór UNITAL. Imajen: Tomé Amado

DILI, 06 fevereiru 2020 (TATOLI)–Eis-traballadór Universidade Oriental Timor Lorosa’e (UNITAL) hamutuk na’in 61 ne’ebé mak UNITAL hasai bazea ba despaxu nú.2/P-FUNATIL/VII/2018; iha loron 29 outubru 2018 deklara sei lori Reitór UNITAL, Florindo Perreira ba tribunál tanba konsidera universidade la iha seriedade atu rezolve sira-nia problema.

“Ami na’in 61 halo ona mediasaun no konsiliasaun hamutuk ho reprezentante UNITAL iha SEFOPE maibé parte reitoria laiha kooperasaun atu solusiona problema ne’e. Entaun faze tuir mai ami sei hakat ba arbitrazen maibé la iha nafatin solusaun mak dalan ikus ba tribunál,” Portavós eis-traballadór UNITAL, Crisanto Esteves-Lero liuhusi konferénsia imprensa perante jornalista sira iha edifísiu Koperativa Ai-tarak Laran, ohin.

Crisanto Esteves hateten, dalan ikus ba tribunál ne’e atu husu responsabilidade autoridade akadémiku nian hanesan Reitór UNITAL bele presta ninia deklarasaun kona-ba eis-dosente na’in 61 ne’e ninia partisipasaun iha prosesu anteriór. “Ami hakarak sira bele ba presta deklarasaun iha Tribunál katak los ka lae ami 61 ne’e uluk sai nu’udar sira-nia funsionáriu ka lae”.

Tuir nia, problema ne’ebé akontese antes ne’e sira nu’udar dosente permanente, depois kuandu prosesu akadémiku ne’e iha ona mudansa, universidade muda sira ba dosente parte tempu maibé laiha justifikasaun ba sira-nia estatutu. Tan ne’e mak eis-dosente 61 ne’e deside lori kazu ne’e ba oin tanba laiha definisaun.

Portavós ne’e deklara katak problema simples ida kuandu UNITAL konsidera sira la’ós dosente ona iha universidade ne’e entaun tenke kumpre rekizitu ne’ebé iha hodi rekopera direitu eis-dosente sira ne’e nian ne’ebé hatur iha lei 55 elaborál nian ho indemnizasaun.

Entretantu, Portavós eis-traballadór UNITAL, Crisanto Esteves-Lero haktuir, UNITAL hapara eis-dosenti sira ne’e tanba razaun osan laiha.

Ne’eduni husi faze dahuluk eis-dosente 21 tenke lakon sira-nia direitu iha mandatu Reitór Interinu, Eujevio Dias Quintas nian no tuir mai iha loron 1 janeiru 2018 husi mandatu Reitór Florindo Pereira nian, eis-dosente 41 lakon tan sira-nia direitu agora oinsá ho partisipasaun sira nian husi tinan 10 mai karaik to’o agora laiha solusaun.

Relasiona ho notísia ne’e, oras ne’e jornalista TATOLI, sei kontinua halo atualizasaun ho parte reitoria UNITAL.

Notísia relevante:UNITAL Kompromete Hadi´a Sistema

UNITAL Eleva Kualidade, Reforsa Jestaun Instituisaun

Jornalista : Tomé Amado

Editór       : Rafy Belo

1 KOMENTÁRIU

  1. Ita bo’ot sira iha diretu tomak atu ezizi no nu’udar estudante UNITAL senti triste tanba hasai houtu dosente ne’ebe espesial ba iha KOMUNIKASAUN sosial no fim ami mak sai vitima

HAKEREK NO HATÁN

Please enter your comment!
Please enter your name here