Logotipu UNITAL.

DILI, 25 novembru 2019 (TATOLI)-Universidade Oriental Timor Lorosa´e (UNITAL) liuhusi Reitór Florindo Pereira kompromete katak iha nia lideransa buka hadi´a sistema iha universidade ne´e hodi “hetan konfiansa” estudante sira atu labele transfere ba ensinu superiór sira seluk.

“Ami konsidera dezafiu ne’e (transfere) maibé ami la foti kestaun boot kona-ba asuntu ne’e tanba ida ne’e ita tenke konsidera polítika ka jestaun ne’ebé kada instituisaun ida tenki iha,” dehan Reitór Florindo Pereira ba Ajénsia TATOLI iha ninia kna’ar fatin kampus UNITAL, Becora, (25/11/2019).

Akadémiku ne´e esplika, UNITAL nafatin hala’o ninia prosesu sira hodi nune’e bele hadi´a aan di´ak liután. Universidade prontu atu moderniza ninia instituisaun hodi hetan ninia ambiente ida adekuadu. Signifika fasilidade ne’ebé mak seidauk sufisiente hanesan sala-de-aula oinsá mak bele kompleta ida ne’e mak presiza prienxe.

Hanesan mós biblioteka no laboratóriu presiza hadi´a liután hodi nune’e bele gaña konfiansa públiku nian atu bele hateke UNITAL nu´udar fatin ida ne’ebé merese tau iha prioridade atu garante futuru jerasaun foun sira nian. “Tan ne’e mak 2020 ne’e parte instituisaun sei aselera liutan prosesu sira ne’e,” garante Reitór Florindo Pereira.

Nia kompara, iha tinan letivu 2019 estudante sira ne´e asesu ba UNITAL menus tanba implementasaun réjime husi UNTL (Universidade Nasionál Timor Lorosa´e) hodi oferese oportunidade ba veteranu nia oan sira hodi asesu edukasaun iha ensinu superiór públiku ne´e.

“Ami konsidera hasoru obstákulu iha tinan ida ne’e (2019) tanba sistema rejime espesiál ne’ebé UNTL kria. Tan ne’e veteranu nia oan sira prienxe hotu fatin iha ne’ebá,” konsidera reitór instituisaun akadémika privada ne´e.

Notísia relevante:UNITAL Hahú Ona Inskrisaun Ba Estudante Foun

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here