Reitor Unital, Florindo Pereira. Imajen Egas Cristovão

DILI, 21 novembru 2019 (TATOLI)-Reitór Universidade Oriental Timor Lorosa´e (UNITAL) Florindo Pereira hateten, ninia parte kontinua reforsa jestaun instituisaun ensinu superiór nian ho atividade estra-kurrikulár atu nune’e bele eleva liután kualidade institusionál.

Reitór Florindo Pereira reafirma katak iha tinan letivu foun, nia iha ona mekanizmu ne’ebé adekuadu atu aberta liután progresu instituisaun ne’e ba públiku. Sistema jestaun ne’e la´o daudaun ona mak liu husi atividade estra-kurrikulár

“Ha’u foin mak tama halo tinan ida resin no ha’u prontu lori, expose imajen UNITAL nian atu bele hetan apresiasaun. Tan ne’e mak atividade estra-kurrikulár ne’ebé aselera daudaun ne’e nu´udar polítika institusionál nian hodi bele atrai liután públiku sira-nia atensaun,” kompromete Reitór UNITAL, Florindo Pereira, iha entrevista hoAjénsia TATOLI iha nia knaar fatin, Kampus UNITAL, Becora (21/11/2019).

Akadémiku UNITAL ne´e haktuir, atividade debate akadémiku kada departamentu ne’ebé sempre realiza kada fulan no atividade sira seluk fó espasu ba estudante sira atu eleva sira-nia kapasidade hodi sai ema ne’ebé kualidade. Atividade ne’e fó rejultadu di´ak tanba kompetisaun kona-ba debate lubuk ida entre instituisaun UNITAL sempre prienxe primeiru no segundu lugar.

Tanba ne’e ho polítika instituisaun nian bele sai ona sasukat ida atu hatene didi´ak progresu no kapasidade rekursu UNITAL nian atu la lakon mós ho universidade sira seluk. Ba anu letivu foun ne’e retória garante katak estudante foun sira ne’ebé sei akaba ensinu sekundáriu barak mak sei integra iha UNITAL.

“Ha’u garante la´ós tanba kualidade kampus de’it maibe mós kualidade iha rekursu umanu tanba ne’e ha’u iha esperansa bo’ot UNITAL sei hetan númeru estudante diferensa ho tinan kotuk,” kompara lider másimu ensinu superiór privadu ne´e.

Entertantu, komisaun hahú organiza ona preparasaun sira ne’e hodi simu rejistrasaun iha tinan letivu foun. Komisaun sira ne’e, tuir Reitór Florindo katak kuaze mesak estudante de’it depois mak reforsa husi dosente ne’ebé tutela ona.

Notísia relevante:UNITAL Haruka Dosente 58 Kontinua Estudu Iha Estranjeiru

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here