Prezidenti Republika, Francisco Guterres "Lú Olo" akompaña husi Majór Jenerál Lere Anan Timor tula devisa ba ofisiaís F-FDTL ne'ebé hetan promosaun diviza. Imajen/Antonio Goncalves

DILI, 02 fevereiru 2020 (TATOLI)- Komandu FALINTIL-Forsa Defeza Timor-Leste (F-FDTL), ohin, promove diviza ba membru Ofisiál Superiór F-FDTL na’in ualu (8) ne’ebé dedika sira nia aan hodi fó kontribuisaun ba dezenvolvimentu Instituisaun F-FDTL.

Notísia Relevante : PR Lú Olo: “Presiza Militár ho Kapasidade atu Kumpre Misaun Oioin”

Ofisiál Superiór F-FDTL ne’ebé promove maka hanesan, Tenente Koronél de Infantaria, Marcelino Ximenes promove ba Koronél, Tenente Koronél de Infantaria, Cesário Salustiano Marçal Ximenes promove ba Koronél, Tenente Koronél de Infantaria, Domingos da Camara promove ba Koronél no Tenente Koronél de Infantaria, Antónia da Silva promove ba Koronél.

Komandu F-FDTL mós promove Ofisiál Superiór na’in haat (4) hanesan, Majór de Infantaria, Guido de Oliveira promove ba Tenente, Kapitaun Tenente de Mariña, João de Fátima promove ba Kapitaun Mar Guerra, Majór de Infantaria, Mário Baptista promove ba Tenente Koronél no Majór de Infantaria, Hélder da Costa promove ba Tenente Koronél.

Promosaun ne’e hala’o direita husi Komandante Supremu FALINTL-FDTL, Francisco Guterres Lú Olo akompaña no eis Primeiru-Ministru, Mari Alkatiri, no Xefe Estadu Maiór Jenerál F-FDTL, Majór Jenerál Lere Anan Timur iha ambitu serimónia aniversáriu transformasaun FALINTIL ba F-FDTL ba dala-19 (02 fevereiru 2001-2020) iha Kuartél Jenerál F-FDTL, Fatuhada, Dili.

Notísia Relevante : Komandante Supremu Prontu Defende Militár Sira iha Kualkér Situasaun

Xefe Estadu Majór Jenerál Lere Anan Timur dehan, promosaun ne’e hala’o iha ámbitu komemorasaun loron FALINTIL transforma ba F-FDTL ba dala-19 ho tema “Saran Aan Tomak Ba Rai no Soberania Nasaun” marka tan pájina signifikativu ba dezenvolvimentu F-FDTL.

Promosaun ne’e halo nu’udar re-koñesimentu  ida ba antiguidade dezempeñu no dedikasaun  ba servisu ne’ebé militár idak-idak tenke hatene didi’ak hanesan konfiansa institusionál  ba nia kompeténsia atu dezempeña funsaun ho responsabilidade boot liután.

Lere dehan, F-FDTL sei kontinua hala’o nia papél ho lealdade abnegasaun no respeitu sakrifísiu atu garante pás, estabilidade no propriedade hodi lori F-FDTL sai forsa modernu dezenvolve aan sai profisionál hodi halo misaun servisu iha rejionál, globál bainhira presiza nu’udar forsa manutensaun dame ba Organizasaun Nasoins Unidas (ONU).

Komandante F-FDTL ne’e apela ba forsa jerasaun foun sira presiza kaer metin prinsípiu luta FALINTIL nian atu lori povu moris iha liberdade.

“Ha’u husu ba imi atu kontinua serbí nafatin ho aten brani no laran tomak,” Lere hateten.

Nia dehan, doutrina glorioza ne’ebé FALINTIL sira halo ba rai ne’e nu’udar espíritu nasionalizmu atu ema hotu- hotu ne’ebé envolve iha forsa kontinua la’o di’ak liu ba futuru.

Lere husu atensaun ba governu presiza buka rezolve problema sira ne’ebé F-FDTL hasoru hodi kompleta no aumenta no kapasita rekursu umanu no infraestrutura no ekipamentu servisu ne’ebé modernu.

Tuir nia katak, mezmu F-FDTL foin halo tinan-19, maibé membru sira partisipa iha misaun dame ONU nian, inklui tuir treinamentu oin-oin iha rai laran no rai li’ur, hanesan iha tinan 2019 membru Komponente Terrestre no Komponente Navál  ba partisipa ezersísiu  SOFEC19 iha Portugál hodi hatudu dezempeñu ne’ebé furak tebes ba akuisaun ba kompeténsia no kapasidade atu servisu nafatin hodi prepara aan  ba hala’o knaar bainhira presiza.

Ba daudaun ne’e, F-FDTL mós atu halo efetivasaun ba Komponente Aéreu Ligeira halo tiha ona revalidasaun lisensa  ba F-FDTL nia pilotu sira, atu ne’e permite sira bele uza elikópteru, tanba membru na’in rua ba tuir ona kursu pilotu iha Xina no oras ne’e daudaun Núkleu Komponente Aéreu Ligeira ne’e administrativamente kolokadu provizóriu iha Komponente Navál hodi hein bainhira prienxe ona kondisaun ne’ebé presiza, hafoin halo efetivasaun ba autónoma.

Nia hatutan, Komandu F-FDTL sei kontinua dezenvolve ninia Estratéjiku Defeza no Seguransa Nasionál  hodi kumpre lei iha defeza nasionál ne’ebé terminadu tiha ona hodi define loloos misaun F-FDTL ohin ba futuru.

Ba oin, Komandu F-FDTL mós prepara ona lejizlasaun foun hodi kria Sistema Autoridade Marítima no Autoridade Marítima Nasionál ne’e sei uza rekursu umanu no rekursu materiál Komponente Navál ne’ebé sei iha dependénsia ba polítika Governu liu husi Ministériu Defeza hodi diskute kle’an asuntu ne’e.

Iha serimónia aniversáriu transformasaun FALINTIL ba F-FDTL ne’e hala’o mós demonstrasaun aviaun F-FDTL husi Forsa Aéreu, ne’ebé lori husi Sarjentu Pilotu, António Duarte Soares.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here