Prezidente Repúblika, Francisco Guterres Lú Olo. Imajen/TATOLI

DILI, 02 fevereiru 2020 (TATOLI)–Xefe Estadu, Francisco Guterres Lú Olo hanesan mós komandante supremu ba Forsa Armada, prontu hamriik hamutuk ho militár sira iha kualkér situasaun. 

“Ha’u hato’o ba imi katak, nu’udar imi-nia Komandante Supremu, ha’u prontu hamriik iha imi-nia sorin, iha tempu di’ak no susar. Haree ba interese Forsa Armada nian ha’u sei defende imi beibeik. Ha’u fiar katak interese sira-ne’e tama hotu iha objetivu-sira Timor-Leste nian”, Komandante Supremu hato’o prontidaun ne’e, liuhusi diskursu serimónia komemorasaun Aniversáriu FALINTIL-Forsa Defeza Timor-Leste ba dala 19, iha Kuartél-Jenerál F-FDTL, Fatuhada, Dili ohin.

Aman nasaun ne’e rekoñese katak nasaun livre no soberana ne’ebé de’it presiza forsa armada ida hodi asegura defeza militár–ho ninia meius rasik ka liuhosi aliansa ho rai sira seluk–hodi bele hasoru agresaun ka ameasa esterna ne’ebé de’it.

Nia subliña katak, uluk, ohin no aban-bainrua, Forsa Armada mós komponente ida-ne’ebé kontribui no garante identidade nasionál–valór ida-ne’ebé nasaun tenke kaer metin no fó orgullu ba Komandante Supremu.

Prezidente Repúblika konta tuir, desizaun ne’ebé foti iha tinan 2000 –atu forsa gerrilla nakfila ba forsa militár konvensionál ida, nasionál, hodi serbí sosiedade, hakruuk ba podér polítiku konstitusionál, harii ho timoroan profisionál, kompetente, preparadu no motivadu–mak desizaun estratéjika di’ak liubá interese nasaun nian.

Nia sita, Polítika Defeza Nasionál hatuur ho konseitu estratéjiku rua–ida mak Defeza no Seguransa, ida seluk mak Militár. Polítika ne’e define Forsa Armada sira-nia misaun, sistema forsa nian no dispozitivu. La kle’ur tan sei aprova dokumentu kona-ba asuntu sira-ne’e. Importante tebe-tebes katak dokumentu estratéjiku sira-ne’e kompleta malu.

PR Lu Olo konsidera dokumentu sira-ne’e iha valór boot, tanba, sei hamosu doutrina estratéjika rasik kona-ba defeza militár no buka liuliu atu identifika no justifika opsaun estratéjika militár sira-ne’ebé F-FDTL presiza atu bele hala’o sira-nia misaun.

“Hanesan mós ita halo ho instituisaun sira seluk, ita halo avaliasaun ba servbsu saída mak instituisaun militár hato’o. Kona-ba Forsa Armada, ita haree ba oinsá sira kontribui ba estabilidade nasaun nian”, nia dehan tan.

Partisipa iha serimónia komemorasaun ne’e, Eis-Titulár Órgaun Soberania, Membru Parlamentu Nasionál no Governu, Xefe Estadu Maiór Jenerál FALINTIL-Forsa Defeza Timor-Leste, Embaixadór no Reprezentante Korpu Diplomátiku, Komandante Forsa Defeza Australiana Indo-Pacific, Endeavour Komodoro James McCormack, Veteranu no Kombatente Luta Libertasaun Nasionál no konvidadu sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here