Prezidente Repúblika, Francisco Guterres Lú Olo, halao hela pasarevista ba formatura F-FDTL bainhira partisipa iha aniversáriu F-FDTL ba dala19 iha Kuartél jerál F-FDTL, Fatuhada, Dili, 02 fevereiru 2020. Imajen Tatoli/António Gonçalves

DILI, 02 fevereiru 2020 (TATOLI)–Prezidente Repúblika (PR), Francisco Guterres Lú Olo hateten Timor-Leste presiza iha Forsa Armada ida-ne’ebé iha kapasidade atu kumpre misaun oioin.

“Haree ba senáriu atuasaun sira-ne’ebé identifika ona iha Konseitu Estratéjiku Militár, Timor-Leste nu’udár nasaun ida-ne’ebé ho área responsabilidade ne’ebé luan, ho rai keta-ketak no vulnerável, ita presiza iha Forsa Armada ida-ne’ebé iha kapasidade atu kumpre misaun oioin”, Komandante Supremu hato’o asuntu ne’e, liuhusi diskursu serimónia Komemorasaun Aniversáriu FALINTIL-Forsa Defeza Timor-Leste (F-FDTL) ba dala 19, iha Kuartél Jenerál F-FDTL, Fatuhada, Dili ohin.

Nia dehan, importante hatuur FALINTIL-FDTL iha territóriu nasionál tomak, halo sira hakbesik-an ba komunidade no kontribui ba estabilidade no seguransa nasionál liuhosi apoiu militár bainhira presiza.

“Maibé, importante mós ba ita haree oinsá de’it ita-nia militár timoroan sira bele partisipa iha misaun ba pás no estabilizasaun internasionál no kontribui hodi hametin liután modelu ida kona-ba seguransa koletiva rejionál hasoru risku no ameasa foun, nune’e ita bele kumpre Estadu ninia polítika esterna. Ha’u fiar katak ita-nia militár sira, iha FALINTIL-FDTL, prontu atu kumpre misaun sira-ne’e bainhira oportunidade mosu”, nia fiar.

Aleinde ne’e, PR Lu Olo subliña katak misaun fundamentál sira-ne’ebé maka fó ba sira, ambiente seguransa daudaun nian ezije vizaun ida-ne’ebé integradu liu, katak laiha fronteira entre seguransa rai-laran no seguransa esterna.

“Ita presiza vizaun ida-ne’ebé loke oportunidade ba militár sira atu serbisu hamutuk ho Forsa no Servisu Seguransa iha situasaun ameasa boot ka perturbasaun ba órden konstitusionál demokrátika ka kalamidade públika”, nia dehan tan.

Xefe estadu fó atensaun mós katak importante tebes hatene valoriza jeografia Timor-Leste nian, potensiál estratéjika no oportunidade sira-ne’ebé tasi bele fó rekursu timoroan nian ba kreximentu ekonómiku. Tamba ne’e, presiza iha estratéjia nasionál ida ba tasi, iha modelu Autoridade Marítima ida-ne’ebé inkluzivu no haburas FALINTIL-FDTL nia Komponente Naval atubele kontribui di’ak liubá seguransa marítima.

“Tanba ita-nia rekursu uitoan de’it, podér polítiku maka tenke define saida loos mak hakarak, fó rekursu ne’ebé adekuadu ba desizaun saída de’it maka foti no tenke prontu atu simu risku saida de’it ne’ebé iha ligasaun ho misaun Forsa Armada nian. Forsa Armada tenke haree oinsá ajusta ninia estrutura, organizasaun no meiu ba kompromisu orsamentál sira-ne’ebé asumi ona no mós ba knaar sira-ne’ebé determinadu ona”, nia subliña.

Ikusliu, aman nasaun ne’e fó hanoin katak podér polítiku tenke tetu didi’ak kona-ba efetivu Forsa Armada nian tuir misaun sira-ne’ebé maka fó ba sira no presiza mós hadi’a rásiu despeza nian entre komponente tolu – pesoál, operasaun no manutensaun, no investimentu – katak define persentájen ida hosi Produtu Internu Brutu nu’udár kompromisu orsamentál ne’ebé estável ba Defeza Nasionál.

Partisipa iha serimónia komemorasaun ne’e, Eis-Titulár Órgaun Soberania, Prezidente Tribunál Rekursu, Deolindo dos Santos, Membru Parlamentu Nasionál no Governu, Xefe Estadu Maiór Jenerál FALINTIL-Forsa Defeza Timor-Leste, Embaixadór no Reprezentante Korpu Diplomátiku, Komandante Forsa Defeza Australiana Indo-Pacific, Endeavour Komodoro James McCormack, Veteranu no Kombatentes Luta Libertasaun Nasionál, no konvidadu sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here