Diretór Jerál Servisu Migrasaun, Superintendente Polísia Agostinho da Silva Gomes. Imajen Tatoli/Eugénio Pereira

DILI, 28 janeiru 2020 (TATOLI)-Diresaun Nasionál Servisu Imigrasaun hosi Ministériu Interiór, hahú segunda (27/01/2020), halo ona pasarevista ba sidadaun estranjeru ne’ebé tama no sai iha aeroportu, portu no fronteira terrestre hodi prevene virus corona atu labele da’et mai Timor-Leste.

Diretór Jerál Servisu Migrasaun, Superintendente Polisia, Agostinho da Silva Gomes, hateten intervensaun migrasaun nian ne’e atu halo prevensaun ba virus corona ne’ebé dadaun ne’e mosu iha Provinsia Wuhan, Xina no kontinua da’et ona ba nasaun seluk iha mundu.

“Ohin kedas ami kontaktu ona ami-nia ekipa sira iha postu integradu atu halo pasarevista másimu  ba pasajeiru sira ne’ebé halo viajen liuhosi  fronteira sira para ita antisipa virus corona foun ne’ebé sai isu globál atu ita prevene mós iha Timor-Leste,” katak, Agostinho da Silva Gomes, ba jornalista sira durante konferénsia imprensa, iha ninia servisu fatin, Villa-Verde, segunda horiseik.

Autoridade Servisu Alfandega halo hela pasa revista ba visitantes sira neebe tama sai iha Fronteira Motaain,Batugade. Imajen/Agapito dos Santos

Notísia Relevante : Bolseiru Timoroan iha Xina Sente Ameasadu ho Virus Corona, Husu Governu atu Evakua Sira

Nia dehan tan, dadaun ne’e nia parte simu ona kontaktu hosi Organizasaun Saúde Mundiál (OMS) atu fó apoiu formulariu no ekipamentu seluk tan hodi distribui ba vizitante sira ne’ebé tama no sai iha territóriu Timor-Leste  atu priense bainhira sofre moras.

“Ohin Organizasaun Saúde Mundiál mós kontaktu ona ami para koopera servisu ne’e no  sira mós sei apoia materiál no formuláriu ne’ebé sei koordena direta husi Ministériu Saúde,”nia reforsa liután.

Notísia Relevante : Antesipa Virus Corona, Ministériu Kompetente Koopera Hodi Kontrola Sasán no Ema Tama-Sai iha Aeroportu

Ekipa koordenada iha postu fronteira, aeroportu no portu tenke taka ibun uja masker durante prosesu  pasarevista ba vizitante sira liliu sidadaun sira ne’ebé ho ninia orijen hosi Xina.

Notísia Relevante : Prevene Virus Corona, Timoroan Hotu Tenke Kumpre Giaun OMS

Hatan kona-ba antes ne’e, ekipa médiku hosi Ministériu Saúde destaka ona ba postu fronteira, Komandante UPF ne’e,  informa to’o agora seidauk haree prezensa médiku sira nian iha postu integradu sira iha fronteira Munisípiu Bobonaro, Covalima no Oé-Cusse.

“Too agora Ministériu Saúde seidauk kontaktu ho ami para haree servisu sira ne’e oinsá,”nia hatete.

Notísia Relevante : MS Koloka Ona Pesoál Saúde Sira Iha Fronteira, Aeroportu, Portu Asegura Virus Corona

Entretantu, Organizasaun Saúde Mundiál iha Timor-Leste alerta no distribui ona broxura ba komunidade atu hakbesik ba sentru saúde, postu saúde no ospitál sira bainhira sofre moras ho sintoma hanesan isin manas maka’as, mear ne’ebé susar dada iis no seluk tan.

Notísia Relevante : Prevene Virus Corona, Timoroan Hotu Tenke Kumpre Giaun OMS

Virus corona ne’ebé mosu iha sidade Wuhan, Xina, to’o loron 26 fulan-janeiru 2020 ne’e hamate ona ema hamutuk 56 no da’et ona ba ema hamutuk 1.975.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here