Bolseiru timoroan, Nicodino da Cruz, ne'ebé hala'o nia estudu mestradu iha área Engineering iha China University of Geosciences- Wuhan. Imajen/Facebook.

DILI, 25 janeiru 2020 (TATOLI) – Bolseiru timoroan na’in-19 iha sidade Wuhan, Provínsia Hubei, Xina, sente ameasadu no husu Governu Timor-Leste atu evakua tiha sira tanba virus corona hamate ona ema 39 iha sidade ne’e.

“Ami iha ne’e sente tauk loos tanba virus corona ne’e hahú sa’e makaas loos ne’ebé ami kuaze semana rua sulan iha dormitóriu laran de’it”, bolseiru Nicodino da Cruz ne’ebé hala’o nia estudu mestradu iha área Civil Engineering iha China University of Geosciences-Wuhan, ba Ajénsia TATOLI via mídia sosiál, ohin.

Nicodino da Cruz dehan timoroan na’in-19 ne’ebé iha sidade Wuhan tauk atu sai husi dormitóriu tanba virus corona hahú kona ema barak iha fatin refere.

“Iha sidade Wuhan virus afeta ona ba ema 729 no na’in-39 mak mate ona no 30 mak rekupera ona, ne’ebé universidade bandu ami atu sai, karik sai bá hola sasán tenke uza masker (taka ibun) no tama fase liman ho ai-moruk”, nia informa.

Nune’e, bolseiru ne’e husu ba Governu Timor-Leste liuhusi ministériu relevante atu koordena ho Governu Xina, atubele foti medida preventiva emerjénsia ida ba timoroan sira iha sidade seluk. Tanba virus ne’e aumenta espalla ba fatin hotu-hotu, no agora sidade Wuhan bandu ona movimentu ka viajen doméstika no internasionál ema tama-sai.

“Haree ba situasaun agora ami husu ba Governu atubele foti medida preventiva hodi evakua ami husi fatin ne’e”, nia husu ho triste.

Hodi dehan timoroan sira ne’ebe iha sidade Wuhan laiha posibilidade atu sai husi fatin ne’e, maibé ba sira ne’ebé agora iha sidade seluk, Governu sei bele koopera ho embaixada para bele lori sira sai husi sira-nia fatin.

“Hein to’o situasaun normál maka sira filafali mai Xina, tanba ita labele lakon ita-nia rekursu umanu, joven no asset ba nasaun Timór nian iha ne’e bainhira virus kona”, sujere.

Timoroan sira ne’ebé iha Wuhan mós iha situasaun izoladu hela, seidauk iha ida maka afetadu husi virus refere. “Mas iha mós posibilidade ba Ministériu Negósiu Estranjeiru no Kooperasaun Timor-Leste atu negosia ho Governu Xina para lori ami sai husi Wuhan, ami prontu atu koopera no agradese liután”, bolseiru ne’e husu.

Estudante estranjeiru sira husi nasaun barak iha universidade bandu atu sai husi kada dormitóriu ida-idak nian hodi hein Governu Xina esforsu kombate virus ne’e.

Bolseiru na’in-19 ne’e estudu iha universidade neen hanesan, China University of Geosciences (Wuhan), China Central Normal University, Huazhong University of Science and Technology, Wuhan University, Wuhan University of Science and Technology, Hubei University no Zhongnan University of Law.

Nia dehan eis Embaixadora Timor-Leste ba Xina, Vicky Tchong, mak fahe ona informasaun ba bolseiru timoroan sira liuhusi grupu WhatsApp atu kuidadu an liuliu tuir de’it orientasaun ne’ebé universidade sira fó no mantein iha dormitóriu.

“Embaixadór Timor-Leste iha Xina ne’e seidauk fó informasaun ruma mai ami, no labele mai duni tanba transporte lokál sira taka hotu”, dehan.

Nune’e, bolseiru ne’e rekomenda ba Governu Timor-Leste hahú kontrola rigoroza ba aeroportu, portu no fronteira terrestre sira hodi evita virus ne’e tama iha Timor-Leste tanba hamate ema ho lalais.

Hodi husu mós ba Governu atu bandu populasaun labele kasa animál fuik sira liuliu niki tanba deskonfia virus ne’e mai husi niki ne’e.

“Ha’u husu mós ba ita-nia komunidade sira atu kuidadu an liuliu labele konsome animál fuik sira liuliu niki tanba virus mai husi ne’ebá”, Nicodino husu.

Tuir dadus Wuhan Pneumonia Geographical Distribution ne’ebé autoridade Xina fó sai, ohin, ema hamutuk 1305 mak infetadu husi virus corona, na’in-41 mate ona no 39 rekupera husi virus ne’e hafoin hetan tratamentu. Enkuantu, husi totál ne’e, virus afeta makaas liu iha Wuhan mak ema 729 infetadu, mate 39 no 31 mak rekupera ona.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here