Estoke hahán ne'ebé bolseira sira sei iha. Imajen/Bolseira Zelita Viegas.

DILI, 26 janeiru 2020 (TATOLI) – Bolseiru timoroan iha sidade Wuhan, Provínsia Hubei, Xina, na’in-19 hahú menus ai-han atu konsome tanba izola an iha dormitóriu durante semana ida hodi prevene husi virus corona.

“Ami iha ne’e nafatin izola an atu evita husi virus corona ne’e. Ami kontinua halo orasaun de’it atu ba oin iha dalan ba ami lalais, hodi hetan dalan sai no liuliu hahán”, bolseira Zelita Viegas ne’ebé halo estudu lisensiatura iha área Medisina iha Huazhong University of Sience and Technology, sidade Wuhan, ba Ajénsia TATOLI via mídia sosiál, ohin.

Iha 23 janeiru, tuku 10:00 dadeer, Governu Xina liuhusi Autoridade Provínsia Hubei husu atu hapara movimentu hotu hanesan transporte públiku sira, aeroportu, train station no fronteira entre sidade sira hotu blokeadu.

Aléinde ne’e, merkadu no supermerkadu boot sira iha Wuhan hahú taka ona, nune’e estudante timoroan sira ne’ebé izola an husi 20 janeiru ne’e nia hahán komesa diminui.

“Daudaun ami totalmente poupa hahán tanba iha ne’e merkadu taka hotu, tantu supermerkadu ida oras 24 ne’ebé besik ami ne’e loron hirak liubá sei loke, mas agora taka hotu ona no ami lahatene data fiksu bainhira mak loja sira loke fali”, Zelite preokupa.

Bolseira ne’e dehan, agora, iha universidade balun ne’ebe timoroan sira hela ba ne’e estudante balu husi rai seluk afetadu tiha ona, aat liután mak hela iha dormitóriu hanesan. “Ne’ebé , ida ne’e kestaun tempu de’it, bainhira mak atu kona timoroan sira, ita lahatene”, nia hato’o ho triste.

Nune’e nia dehan, estudante sira iha Wuhan presiza evakua urjente tanba virus afeta iha sidade ne’e aumenta ba beibeik no númeru mate mós boot iha Xina.

Bolseira na’in-neen iha sidade Wuhan ne’ebé hasoru situasaun menus hahán. Imajen/Zelita Viegas.

“Ami-nia stock hahán mós sei la aguenta ba tempu naruk (semana rua ba leten tan) bainhira situasaun hanesan ne’e hela deit, ami sei la aguenta. Ida ne’e mak ami-nia situasaun reál”, nia hato’o.

Nune’e, bolseira husi Munisípiu Dili ne’e husu Governu Timor-Leste atu koordena ho Governu Xina hodi foti solusaun urjente no labele neineik.

“Ami estudante iha Wuhan husu hanesan ne’e la’ós tanba orsamentu mak la suporta ou la buka meiu atu hetan hahán, maibé autoridade lokál mak lá autoriza ami sai. Husu Governu Timor-Leste nia kooperasaun no intervensaun atubele fó autorizasaun mai ami bele sai husi fatin ne’e. Ami mos hakarak loos atu sai husi fatin ida ne’e, mas momentu ne’e movimentasaun bá-mai paradu”, adianta.

Antes ne’e, bolseiru Nicodino da Cruz ne’ebé estudu mestradu iha área Civil Engineering iha China University of Geosciences, hatete timoroan na’in-19 iha Wuhan sente ameasadu no husu Governu Timor-Leste evakua sira tanba virus corona hamate ona ema iha sidade ne’e.

“Husu ba Governu Timor-Leste liuhusi ministériu relevante atu koordena ho Governu Xina, atubele foti medida prenventiva emerjénsia ida ba timoroan sira iha sidade seluk. Tanba viirus corona aumenta expalla ba fatin hotu-hotu, no agora sidade Wuhan bandu ona movimentu ka viajen domestika no internasionál ema tama-sai husi Wuhan”, katak.

Hodi dehan, tirmoroan sira ne’ebe iha sidade Wuhan laiha posilidade atu sai husi fatin ne’e, maibé ba sira ne’ebé agora iha sidade seluk, Governu sei bele koopera ho embaixada para bele lori sira.

Nia hatutan bolseiru 19 ne’ebé daudaun iha Wuhan mós iha situasaun izoladu hela, seidauk iha ida maka afetadu husi virus refere. Se iha posibilidade ba Ministériu Negósiu Estranjeiru no Kooperasaun (MNEK) atu negosia ho Governu Xina para lori sira sai husi Wuhan no prontu atu koopera no agradese liután.

Estudante timoroan na’in-19 ne’e estudu iha universidade hanesan, China University of Geosciences (Wuhan), China Central Normal University, Huazhong University of Science and Technology, Wuhan University, Wuhan University of Science and Technology, Hubei University no Zhongnan University of Law.

Governu Timor-Leste liuhusi MNEK, iha segunda (27/01/2020), sei halo kontaktu koordenasaun hodi haree posibilidade Embaixada Xina atu proteje inklui halo evakuasauan ba estudante sira iha sidade Wuhan, Provínsia Hubei.

Ministru Negósiu Estranjeiru no Kooperasaun (MNEK), Dionisio da Costa Babo Soares, hateten Governu ho ministériu relevante sei halo esforsu no segunda (aban) sei kontaktu ho Embaixada Xina atu oinsá mak buka dalan evakua timoroan sira iha Wuhan.

“Agora sei hein hela informasaun ka update husi Embaixada Timor-Leste iha Beijing”, Ministru Dionisio Babo Soares, informa bainhira responde Ajénsia TATOLI liuhusi mensajen facebook.

Ministru salienta bainhira timoroan sira protejidu no kontroladu hela entaun di’ak, maibé se sente ameasa, maka Governu sei fasilita atu halo evakuasaun no hato’o katak to’o sesta dadeer (24/01/2020), sira hotu iha saúde di’ak nia laran.

“Kontaktu sei halo nafatin họ Embaixada Timór iha Beijing ne’ebé monitora hela estudante sira ne’e hotu. Pur enkuantu, to’o agora laiha nasaun ida mak bele lori nia ema sai ka tama husi Wuhan, tanba ne’e, ami hein informasaun detalla maka depois koordena ho Governu Xinés”, Ministru Dionísio hatete.

Notísia relevante : Aban, MNEK Kontaktu Embaixada Xina Atu Haree Posibilidade Protesaun Inklui Evakuasaun ba Estudante Timoroan

Iha rai-laran, Governu hasai ona rezolusaun iha semana kotuk liu husi Konsellu Ministru para tau ‘ona health check’ iha pontu entrada hotu mai Timór, hanesan portu, aeroportu ho fronteira terrestre.

Tuir dadus Wuhan Pneumonia Geographical  Distribution ne’ebé autoridade Xina fó sai, ohin, ema hamutuk 2022 mak infetadu husi virus corona, na’in-56 mate ona no kuaze 45 rekupera husi virus ne’e hafoin hetan tratamentu.

Notísia relevante : Bolseiru Timoroan iha Xina Sente Ameasadu ho Virus Corona, Husu Governu atu Evakua Sira

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here