Ministru Negósius Estranjeirus no Kooperasaun (MNEK), Dionísio da Costa Babo Soares. Imajen/TATOLI

DILI, 26 janeiru 2020 (TATOLI) –Governu Timor-Leste liuhusi Ministériu Negósiu Estranjeiru no Kooperasaun (MNEK), segunda aban (27/01/2020), sei halo kontaktu koordenasaun ho Embaixada Xina  atu haree posibilidade protesaun inklui evakuasaun ba estudante Timoroan iha sidade Wuhan, Provínsia Hubei, Xina.

Notísia Relevante : Bolseiru Timoroan iha Xina Sente Ameasadu ho Virus Corona, Husu Governu atu Evakua Sira

Timoroan sira iha Xina, inklui Estudante Timoroan na’in 19 ne’ebé horik iha sidade Wuhan, trauma no ta’uk sai tanba virus corona hahú kona ema barak iha Wuhan no lubun mak mate ona iha Xina.

Ba preokupasaun Timoroan sira nian ne’e, Ministru Negósiu Estranjeiru no Kooperasaun (MNEK), Dionisio da Costa Babo Soares, hateten, governu ho ministériu relevante sei halo esforsu no segunda aban  sei kontaktu ho Embaixada Xina atu oinsá mak buka dalan evakua Timoroan sira iha Wuhan.

“Agora sei hein hela informasaun ka update husi Embaixada Timor-Leste iha Beijing,” informa Ministru Dionisio Babo Soares, hodi responde Ajénsia TATOLI liuhusi mensajen rede sosiál  Facebook, ohin.

Notísia Relevante : MS Koloka Ona Pesoál Saúde Sira Iha Fronteira, Aeroportu, Portu Asegura Virus Corona

Ministru Dionisio hateten, bainhira Timoroan sira protejidu no kontroladu hela entaun di’ak, maibé sé sente ameasa, maka Governu sei fasilita  atu halo evakuasaun.

To’o sesta dadeer (24/01/2020), Timoroan hotu iha saúde di’ak nia laran.  Iha sidade Wuhan mak movimentu tomak paralizadu tanba aviaun ka karreta la bele tama-sai ba sidade Wuhan. Nune’e, estudante   Timoroan sira hela de’it iha eskola ka dormitóriu (asrama).

“Kontaktu sei halo nafatin ho Embaixada Timor iha Beijing ne’ebé monitora hela estudante sira ne’e hotu.  Por enquanto, to’o agora la iha nasaun ida mak bele lori nia ema sai ka tama husi Wuhan, tanba ne’e, ami hein informasaun detallu maka depois koordena ho Governu Xinés,” hateten Ministru Dionisio Babo.

Iha rai laran, Governu hasai ona rezolusaun iha semana kotuk husi Konsellu Ministru para tau ona heath check iha pontu entrada hotu mai Timor, hanesan portu, aeroportu ho fronteira terrestre.

Notísia Relevante : Antesipa Virus Corona, Ministériu Kompetente Koopera Hodi Kontrola Sasán no Ema Tama-Sai iha Aeroportu

Jornalista : Francisco Simões

Editór        : Xisto Freitas

HAKEREK NO HATÁN

Please enter your comment!
Please enter your name here