Nakroma atraka iha realokasaun urjente terminal ró iha Portu Dili. Imajen/Florencio Miranda Ximenes.

DILI, 24 janeiru 2020 (TATOLI) – Nakroma, ohin, atraka tiha ona iha realokasaun urjente terminál ró iha Portu Dili hafoin halo manutensaun iha Surabaya-Indonézia kuaze fulan haat.

Nakroma to’o iha portu foun ne’e iha tuku 12:30, ne’ebé hein direta husi Ministru Transporte no Komunikasaun, José Agostinho da Silva, Prezidente Konsellu Administrasaun Autoridade Portuária Timor-Leste (APORTIL), Flávio Cardoso Neves, no funsionáriu portuáriu nian.

“Tinan kotuk ró ne’e ba docking (manutensaun) liuliu hadi’a komponente importante sira husi ró ne’e hotu, ne’ebé agora to’o fali ona iha Timór. Ita-nia esperansa mak ró ne’e bele fasilita ita-nia populasaun halo dezlokasaun liuhusi meiu transportasaun marítima hanesan Ataúro no Oe-Cusse”, Ministru José Agostinho da Silva afirma hafoin observa direta kondisaun Nakroma iha Portu Dili, ohin.

Notísia relevante : Realokasaun Terminál Ró Funsiona Hafoin Nakroma To’o Timor-Leste

Ministru adianta Nakroma halo reparasaun iha Indonézia no ida ne’e obrigatóriu atu garante seguransa ba vida pasajeiru.

Hodi dehan teknikamente ba manutensaun ró ne’e, mákina sira, eletrisidade, sistema navegasaun no materiál salva vida, pinta fali no hasai ferrujen sira iha ró nia okos.

“Ohin, ha’u hetan esplikasaun husi kapitaun no mós tripulante sira, ita-nia ró ne’e iha tinan ida ne’e ba manutensaun troka hotu komponente importante hanesan mákina sentrál (mesin utama) rua no komponente importante balun iha kapitaun nia fatin hanesan, rádiu, kámara no sala kontrola (control room)”, afirma.

Eis Deputadu Bankada KHUNTO ne’e dehan orsamentu inisiál ba manutensaun Nakroma $226.000, más iha adisionál ho montante rihun $59.

“Ohin, ha’u husu lista komponente ne’ebé sira troka, atu ita halo pagamentu bazeia ba faktu reál ho presu hira inklui sasán uzadu, ita tenke haree no hatene atu selu ho transparente”, nia husu.

Ministru José Agostinho dehan: “Ita labele fiar de’it sira ko’alia, más tenke haree mós sasán uzadu ne’ebé iha no sosa foun ho presu hira para ita halo pagamentu”, katak.

Tanba Governu ho esperansa mak ró ne’e fila ho kondisaun di’ak no mákina importante sira troka hotu atu asegura ba pasajeiru sira.

Prezidente APORTIL, Flávio Cardoso Neves, dehan ró to’o ona mai, ne’ebé sei koordena fali ho kompañia Ben Santoso atu aprezenta lista mákina sira ne’ebé troka ho presu hira atubele prosesa pagamentu ba orsamentu adisionál ne’e.

“Ami sei koordena atu semana oin, sira bele entrega, nune’e, lista ne’e hodi prosesu pagamentu ba orsamentu adisionál ne’e”, dehan.

APORTIL kontratu ho kompañia Ben Santoso husi Indonézia bá halo manutensaun iha Surabaya-Indonézia iha 30 setembru ho totál orsamentu $226.000.

Notísia relevante : Aban, Nakroma Atraka iha Portu Dili

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here