Ró Berlin Nakroma. Imajen Espesiál.

DILI, 23 janeiru 2020 (TATOLI) – Prezidente Konsellu Administrasaun Autoridade Portuária Timor-Leste (APORTIL) Flávio Cardoso Neves informa, aban, ró Nakroma sei to’o iha Portu Dili.

“Ha’u garante aban (sesta) nakroma to’o ona iha Timor Leste, kuandu situasaun di’ak hotu aban tuku 12:00 atraka ona iha portu”, Flávio Cardoso Neves ba TATOLI iha knaar fatin Portu Dili, ohin.

Flávio Cardoso adianta Nakroma finaliza ona manutensaun no teste mákina iha tasi Surabaya no hahú viajen husi Surabaya-Indonézia mai Timor-Leste iha 21 janeiru ne’e.

Nakroma halo reparasaun husi kompañia Ben Santoso iha Indonézia, hafoin iha 30 setembru 2019 arranka husi Timór bá Surabaya.

“Ha’u kontaktu sira (ekipa Kompañia Ben Santoso) agora daudaun ró Nakroma iha ona área tasi Kupang (NTT) no illa Flores nian ho kondisaun mákina di’ak”, katak.

Prezidente APORTIL ne’e dehan kuandu ró viajen hela, ida ne’e sei iha responsabilidade empreza nian, no husu mós atu ekipa husi kompañia akompaña to’o Nakroma to’o iha Timor-Leste.

Hodi orienta mós empreza atu lori hotu sasán ka mákina ne’ebé sira troka ho dokumentu sira atu to’o aban, bele haree, nune’e hatene orsamentu adisionál ba manutensaun ró ne’e.

“Ha’u orienta ona atu makina ne’ebé troka ne’e tenke lori hotu mai para ita hatene sira (kompañia) troka duni ka lae? No fasilita ita atu haree prosesu osan adisionál ne’e”, haktenik.

Sobre orsamentu adisionál, hafoin ró to’o mai mak APORTIL analiza didi’ak dokumentu sira tanba Diresaun Nasionál Transporte Marítima hamutuk ho Biro Klasifikasaun Indonézia halo inspesaun iha Nakroma katak teknikamente ba manutensaun ró, mákina sira, eletrisidade, sistema navegasaun no materiál salva vida, pinta fali no hasai ferrujen sira iha ró nia okos.

Nune’e, Flávio Cardoso dehan APORTIL garante Nakroma aban mai ho kondisaun di’ak tebes atu hala’o operasaun. “Aban to’o mai, sábadu ita haree hotu bele hahú halo operasaun iha domingu”, garante.

Prezidente APORTIL ne’e adianta,  Nakroma mai tarde uitoan tanba APORTIL ho objetivu ida atu hadi’a kondisaun ho di’ak atu ró to’o mai labele iha fallansu ruma hodi gasta osan arbiru.

APORTIL kontratu ho kompañia Ben Santoso husi Indonézia bá halo reparasaun iha Surabaya-Indonézia iha 30 setembru ho totál orsamentu $226.000.

Notísia relevante : Realokasaun Terminál Ró Funsiona Hafoin Nakroma To’o Timor-Leste

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here