Realokasaun terminál ró. Imajen/Imajen/António Gonçalves.

DILI, 16 janeiru 2020 (TATOLI) – Prezidente Konsellu Administrasaun Autoridade Portuária (APORTIL), Flávio Cardoso Neves, informa realokasaun terminál ró ne’ebé inaugura ona husi Governu Timor-Leste no Japaun ne’e loke ba públiku hafoin Nakroma to’o Timor-Leste.

Nune’e, APORTIL deside ona atu funsiona  terminál bainhira Nakroma to’o iha fulan ne’e, hafoin halo manutensaun iha Surabaya-Indonézia.

Hodi garante katak téknikamente Kompañia Ben Santoso finaliza ona manutensaun no daudaun hala’o teste mákina ka rodajen.

“Dezeñu ba realokasaun tuir nesesidade ita-nia ka ró Nakroma nian hodi fasilita”, Prezidente Autoridade APORTIL dehan ba TATOLI hafoin inaugura realokasaun terminál iha kinta ne’e.

Nakroma arranka bá halo manutensaun iha Indonézia, iha 30 setembru 2019, bainhira APORTIL kontrata kompañia Ben Santoso ho totál orsamentu $226.000.

Sobre uma ba terminál, nia dehan daudaun APORTIL mós prevee ona orsamentu millaun $1-resin iha proposta Orsamentu Jerál Estadu 2020 atu konstrui ho andár tolu.

“Ita hein hela orsamentu aprova ita hahú konstrui ona terminál atu pasajeiru sira bele mai tuur hodi hein ró bainhira atu hala’o viajen”, katak.

Hodi dehan APORTIL haree didi’ak kona-ba instalasaun ekipamentu realokasaun terminál ne’e tanba Portu Tibar kuandu di’ak, entaun atividade hotu-hotu ba iha ne’ebá.

Realokasaun terminál ne’e inaugura husi Governu Timor-Leste liuhusi Ministru Transporte no Komunikasaun, José Agostinho da Silva no Governu Japaun liuhusi Vise-Ministru Negósiu Estranjeiru no Asuntu Parlamentár Japaun, Norihiro Nakayama.

Konstrusaun projetu ne’e, ponte kais ida ho naruk metru 100 no luan metru 20 ne’ebé bele akomoda ró pasajeiru rua durante oras 24 nia laran, asesu dalan (moveable land platform) ho medida metru 55×52 no ekipamentu nesesáriu seluk hanesan iluminasaun, fornesimentu bee, enerjia, torneira hamate-ahi no ekipamentu ba seguransa.

Konstrusaun projetu refere hala’o hosi kontratór Japonés Tobishima Corporation no superviziona hosi Japan Port Consultants, Ltd & ldes Inc. ho valór orsamentu kuaze Yen 2.197 (maizumenus millaun $21) no Governu Timor-Leste mós aloka osan millaun $1,147,700.

Notísia relevante : Japaun Prontu Apoia Dezenvolvimentu Transporte Marítima TL

Jornalista : Florencio Miranda Ximenes

Editora : Maria Auxiliadora

1 KOMENTÁRIU

HAKEREK NO HATÁN

Please enter your comment!
Please enter your name here