Udan boot horikalan hamosu inundasaun iha Tasi Tolu, Dili. Imajen/António Gonçalves

DILI, 23 janeiru 2020 (TATOLI)-Maske udan boot iha kalan rua tuituir malu iha Dili laran  (kuarta ho kinta kalan, 22-23/01/2020), la hamosu inundasaun ba abitante sira ne’ebé horik iha suku tolu; Kuluhun, Bemori ho Caicoli, tanba komunidade sira iha konsiénsia  halo limpeza iha uma ninin no hamoos valeta iha semana-semana.

 Notísia Relevante : Família 200-resin iha Tasi-tolu Afetadu ba Inundasaun

Xefe Suku Kuluhun, Deus Dado Martins. Imajen/Osoória Marques

Xefe Suku Kuluhun, Deus Dado Martins, hateten, ho grasa Maromak Nian no komunidade hotu nia kolaborasaun iha atividade limpeza iha sesta, semana-semana, halo suku Kuluhun ‘livre husi inundasaun’ iha udan boot, kalan rua tui-tuir malu.

“Ami hamutuk komunidade Kuluhun sempre halo limpeza semana ida dala ida, nune’e bainhira udan ami-nia komunidade sempre livre husi inundasaun,” hateten Xefe Suku Kuluhun, Deus Dado, ohin, ba Ajénsia TATOLI iha Sede Suku Kuluhun,  Postu Administrativu Cristo Rei Munisípiu Dili.

Xefe Suku Caicoli, Hipolito Marques Sarmento. Imajen/Osória Marques

Xefe Suku Caicoli, Hipolito Marques Sarmento, mós fó sasin katak, rezultadu husi kolaborasaun di’ak husi komunidade suku laran hodi halo limpeza lori komunidade suku laran hotu livre husi inundasaun durante udan boot kalan rua tuituir malu ne’e.

“Udan boot horikalan valeta hotu bee nakonu no nalihun iha uma oin sira, maibé la afeta inundasaun ba komunidade sira-nia uma tanba ami sempre kolabora malu halo limpeza suku laran,” Hipolito Sarmento hateten.

Xefe Suku Bemori, Cristalina Pereira Soares de Oliveira. Imajen/Osória Marques

Husi sorin seluk, Xefe Suku Bemori, Cristalina Pereira Soares de Oliveira,  relata, kona ba udan boot durante kalan rua la hamosu inundasaun iha komunidade Bemori nia uma tanba komunidade sempre halo limpeza hodi hamoos uma ninin no valeta sira ne’ebé dala barak intupidu hodi halo bee nalihun iha tempu udan.

“Bainhira udan no anin boot ha’u sempre simu informasaun husi ha’u-nia xefe aldeia sira karik akontese inundasaun, maibé to’o agora ha’u seidauk simu informasaun katak ami husi suku ne’e iha komunidade balun afeta inundasaun. Ami kontroladu no livre inundasaun,” Cristalina Pereira Soares de Oliveira hateten.

Notísia Relevante : Laiha Ezgotu Hamosu Inundasaun iha Kampung Baru

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here