Komandante Jerál PNTL Komisariu Faustino da Costa Konverse hela ho Xefe Estadu Maiór Jenerál Lere Anan Timur. Imajen/Antonio Gonçalves

DILI, 23 janeiru 2020 (TATOLI)- Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur, preokupa ho servisu Tribunál Distritál Dili (TDD) tanba bele hola desizaun fó livre ba autór sira ne’ebé envolve iha kazu taa kanek membru F-FDTL no PNTL.

Notísia Relevante : Grupu ho Atributu Arte Marsiál Taa Membru PNTL

Jenerál Lere dehan, tuir loos ema kriminozu sira ne’ebé taa no baku forsa Estadu nian tenke prosesa tuir lei no fó pena kastigu ne’ebé justu tuir lei.

“Tribunál tenke neutru, se selae, ita maka kria problema ba malu. Ita haree joven sira taa ita nia polisia ida iha Ai-Mutin, ita haree atu husik ka kastigu?. Ami hein!. Labele akontese hanesan uluk elementu F-FDTL  ida, ema taa nia liman kotu iha Kuluhun, ema kriminozu ne’e ba detein oras 72 sira husik tiha,” hateten Lere ne’ebé akompaña husi Komandante Jerál PNTL, Komisáriu Faustino da Costa, bainhira hala’o konferénsia imprensa, ohin, iha Kuartél Jenerál F-FDTL, Fatuhada, Dili.

Jenerál Lere  la permite bainhira kualkér joven ida taa no baku forsa maka ba tribunál husik ema ne’e livre. Nia fó orden ba forsa sira ba kaer hodi lori ba tribunál no sei husu razaun saida mak tribunál tenke husi ema kriminozu livre.

“Agora mós ha’u hein, se ema sira ne’ebé tama tribunál husik, ami sei kaer fila fali, lori ba tribunál,” dehan Lere.

Iha oportunidade ne’e, Jenerál F-FDTL apela ba grupu krime organizadu sira ne’ebé kontinua tenta perturba lei no orden liuhusi grupu arte marsiál, krime tráfiku droga, tráfiku umanu no krime kontra bandu ho modu saida de’it tenke kuidadu, tanba F-FDTL no PNTL sei la tolera aktu hirak ne’e atu akontese.

Notísia Relevante : Ministru Defeza Deteta Ona Autór Taa Horta

Forsa rua ne’e apela ba grupu hotu- hotu  tenke koopera ho forsa mantein estabilidade no dame, atu nune’e, kontinua kaer metin soberanu nasionál fó valór ba sakrifísiu luta eroi sira ne’ebé mate ba rai ne’e.

“Karik ema ruma ne’ebé liu husi grupu krime organizadu ka GAM mak tenta sobu unidade nasionál hodi hatún dignidade país no lider nasionál  liu-liu eroi sira nian hodi halakon soberanu nasaun ida ne’e,  ami sei la hakru’uk no hatún ami nia kilat bainhira ema ka grupu hakarak sobu nasaun. Apela mós ba ajente estadu ka governu hodi serbí estadu loloos ho neutralidade no  responsabilidade. Ami hatene se maka iha situasaun hirak ne’e nia kotuk,  se maka fasilita, atu halakon situasaun sira ne’e ami sei foti medida hotu- hotu buka halo reflesaun pasifika hato’o aspirasaun saida de’it kana-ba, imi nia hakarak,” nia afirma.

Iha fatin hanesan, Komandante Jerál PNTL, Komisáriu Faustino da Costa, informa,  F-FDTL daudauk ne’e koloka ona ninia forsa unidade hotu- hotu hodi halo patrullamentu iha tempu kalan no loron hodi buka tuir autór kriminozu sira ne’ebé halo krime sei kaer no prosesa tuir lei.

Komandante Unidade Polisia Militár (PM) FALINTIL-Forsa Defeza Timor-Leste (F-FDTL), Majór Abel da Costa Xavier “Niki”  ba tinan 2020 kria rasik ninia regulamentu interna, bainhira sivíl baku militár ka polisia sira sei halo asaun kaptura  direita no la presiza hein karta mandadu kapturasaun.

“Iha tinan  hirak liubá bainhira akontese kazu ema sivíl baku membru FFDTL ami informa ba ami nia komandu  atu  kaer suspeitu tenke hein mandadu kapturasaun, maibé iha 2020 ami sei la haree ba lei, maibé ami haree ba krime ne’ebé mosu ami sei buka suspeitu subar too rai kuak iha ne’ebé de’it ami sei tenke  kaer, se buka suspeitu la hetan kaer inan ho aman lori ba kastigu, ida ne’e mak ami sei halo,”  dehan Niki.

Majór Niki hatutan, F-FDTL no PNTL maka liman kro’at nasaun,  tenke halo servisu hotu- hotu para garante seguransa hodi labele fó oportunidade ba ema kriminozu atu kria problema no konflitu iha Timor-Leste.

Jornalista : Eugénio Pereira

Editór       : Francisco Simões

 

2 KOMENTÁRIU

  1. Presiza kria ekipa independete ida atu bele halo avaliasaun regular ba juis sira ne’ebe serbisu iha tribunal sira. Selae sira-ne’e maka komete krime maka’as liu fali ema baibain sira. Iha kazu barak ona maka juis sira julga la loos tanba interese no bele mos tanba inkapasidade. Hanesan kazu ne’ebe temi iha leten katak ema ne’ebe halo ona krime (taa kotu membru F-FDTL nia liman) maibe ikusmai hetan liberdade sein tama komarka, tenke halo avaliasaun ba juis ne’ebe kaer kazu ne’e. Karik iha avaliasaun maka detekta katak desizaun juis ne’e ninian ne’e la loos, nia rasik maka tenke sai fali suspeitu. So nune’e de’it maka ita bele dehan iha justisa iha ita-nia rai doben ida-ne’e.

  2. krimi sa ida deit mak mosu iha ita nia nasaun sempre iha kronologia, karik Juis singular ou kolektivo mak fo (termo identidade regidensia ) ou husi ema kriminoso ne’e Livre signifika katak sei iha nia proseso no recurso, laos naran husik deit, desisaun saida mak Tribunal distrital Dili, Baucau, Suai, Oecusi, foti sikdifika iha nia razaun, laos narnaran husik deit, ne’e afirmasaun ida ne’ebe mak lalos,Tribunal sempre iha nia Posisaun ida ne’ebe mak firmi no lahalis ba sor-sorin,.

HAKEREK NO HATÁN

Please enter your comment!
Please enter your name here