Ministru Defeza no Ministru Interiór interinu, Filomeno da Paixão de Jesus. Imajen/António Gonçalves

DILI, 22 janeiru 2020 (TATOLI)–Ministru Defeza no Ministru Interiór Interinu, Filomeno da Paixão de Jesus deteta ona autór prinsipál ne’ebé deskonfia organiza grupu ida hamutuk ema na’in-neen, hodi taa Inspetór Polísia, Honorio Horta iha Ai-mutin, área Comoro, to’o suku pontu 11.

Filomeno Paixão ko’alia asuntu ne’e, hafoin enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Kazu taa membru polísia iha Ai-mutin, polísia kaptura ona ema na’in-hitu. Ha’u hakarak hateten katak ema ne’ebé lalin sira ba taa lisuk Inspetór Polísia ne’e, uluk tinan 1999 halai tiha bá Atambua, Indonézia. Ha’u koñese di’ak nia. Ba tiha Indonézia filafali mai iha 2001, envezde tuur nonook, la’e, halo fali buat ida-ne’e. Ha’u deteta ona”, Filomeno deklara ba mídia.

Kona-ba kazu ne’e, Filomeno dehan, laiha ligasaun ho situasaun atuál no ema na’in-hitu ne’e Polísia detein ona, sei submete ba prosesu justisa.

Entretantu, membru Polísia Nasionál Timor-Leste, Inspetór Honorio Horta hetan asaltu husi ema-na’in neen iha área Ai-mutin, bainhira atu ba Eskuadra PNTL Dom Aleixo hodi haree nia alin ne’ebé hetan uluk asaltu.

Husi asaltu ida-ne’e, Inspetór Honorio Horta hanesan mós médiku iha Centro Formação da Polícia (CFP) hetan konsekuénsia ne’ebé boot tanba hetan taa iha parte ulun no tenke suku pontu 11, iha tersa, 21 janeiru 2020, tuku 01:00 madrugada.

Vítima oras ne’e daudaun hala’o ona tratamentu iha Hospital Nacional Guido Valadares (HNGV).

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here