Arguido sira ne'ebé Polisia Nasional Timor-Leste (PNTL) kaptura tanba halo asaltu taa kanek membru PNTL iha area Aimutin, Dili. Imajen /Eugénio Pereira

DILI, 21 janeiru 2020 (TATOLI) – Grupu organizadu ne’ebé utiliza  atributu arte marsiál balun ne’ebé Estadu bandu, segunda madrugada (20/01/2020), halo asaltu ba membru Polisia Nasional Timor-Leste (PNTL) iha area Aimutin hodi rezulta vítima kanek no suku pontu 11.

Sasan sira nebe suspeitu na’in neen uza hodi halo asaltu no ta kanek membru PNTL. Imajen/Eugenio Pereira

Grupu ne’e lori sasán kro’at, hanesan samurai, físka, fatuk hodi halo atake no hakanek Inspetór Honorio  Horta Pinto nu’udar mós pesoál médiku PNTL iha  Sentru Akademia PNTL, Comoro, Dili.

Komandu Polisia Nasionál Timor-Leste (PNTL) Eskuadra Don Aleixo Comoro, Munisípiu Dili, kaptura suspeitu na’in neen (6) ne’ebé deskonfia forte envolve iha kazu ne’e hodi halo mós apreensaun ba sasán kro’at sira iha suspeitu sira nia liman.

Komandante Operasaun Komandu PNTL Interinu, Superintendente Xefe, José Soares   informa, kronolojia kazu ne’e akontese tanba membru Honorio halo vizita ba haree nia alin na’in rua, Angelito Camilho ne’ebé tula ninia maun Florindo Pinto husi área Hudi-Laran ba Ai-Mutin atu fila fali ba uma husi Beto Oeste hetan mós ataka husi joven na’in tolu iha área Ai-Mutin nian.

Joven deskoñesidu lori samurai, ai-dona no fatuk ataka vítima Angelino Camilho monu ho motór konsege halai salva nia-aan, depois akontesimentu, Membru Polisia Honorio hetan kontaktu husi ninia alin na’in rua atu ajuda sira ba hato’o keixa iha Eskuadra Comoro, Dili, maibé sorte aat, bainhira membru polisia ba too uma Aimutin hodi para tiha karreta no la’o ain atu ba Eskuadra Polisia Don Aleixo, Ai-Mutin, derrepente grupu juventude sira lansa ataka hodi ta kedas membru polisia ne’e.

“Hodi kalan kedas PNTL  halo operasaun kaptura joven na’in neen agora entrega ona ba Komandu PNTL Dili hodi prosesa tuir lei,” dehan José ba jornalista liuhusi konferénsia imprensa iha Kuartél Jerál PNTL, Caicoli Dili, ohin.

PNTL kontinua hala’o nafatin operasaun iha tempu kalan koordena ho Komandu F-FDTL hodi evita problema iha sidade Dili.

 Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here