DILI, 22 janeiru 2020 (TATOLI)-Arsebispu Metropolitana Arkidioseze, Mgr. Virgílio do Carmo da Silva, SDB, husu ba autoridade seguransa ho governu atu haforsa seguransa iha liña fronteira terrestre, aeroportu ho portu, hodi bele kontrola atividade tama-sai Timor-Leste.
Notísia Relevante : Autoridade Detein Timoroan Lori Sabu-Sabu Kilograma 3,253
Ho fenómena atividade ilegál hanesan droga ne’ebé tama mai to’o rai laran hodi lori sai livremente ba nasaun viziñu, tuir Bispu Virgílio, hatudu sinál katak seguransa ho fasilidade sira iha portu, aeroportu ho fronteira sei mukit tebes. Tanba ne’e presiza tau atensaun atu kombate atividade ilegál sira ne’e.
“Husu ba órgaun soberanu sira, liuliu parte kompetente tenke hametin justisa no haforsa seguransa iha ita-nia rai laran,” hateten Bispu Virgílio do Carmo da Silva, SDB, hodi responde jornalista sira iha Dili, foin lalais ne’e.
Notísia Relevante : Polisia Deskobre Droga Nijéria iha Sekuénsia ho Kazu Kazál Timoroan
“Bainhira imi hadomi imi-nia rain no hakarak juventude livre husi droga no violénsia, entaun tenke kombate atividade ilegál no monta seguransa iha portu, aeroportu no fronteira.”
Husi sorin seluk, Adjuntu Prezidente Munisípiu Dili, José Filipe Ximenes Smith, fó hanoin katak, presiza haree sistema seguransa iha fronteira atu bele kombate atividade ilegál ne’ebé fó prezuiju ba Estadu nia integridade no ba jerasaun foun sira nia mentalidade.
“Ha’u hanoin no husu ba joven sira, ita hotu-hotu tenke fó-an hodi haree mós kestaun hirak ne’e. Bainhira ita deskobre ka hatene ema ruma lori droga, halo atividade ilegál no fó ameasa ba ita nia nasaun tenke koordena ho autoridade sira atu halo atuasaun imediata no kombate kedas,” hateten José Smith.
Notísia Relevante : Indonézia Seidauk Fó Informasaun Kona-ba Investigasaun Kazál Timoroan Lori Droga
Jornalista : Osória Marques
Editór : Francisco Simões