Autoridade Seguransa kaptura suspeitu Timoroan ida ho Inisiál CMB lori ai-moruk droga ho tipu sabu-sabu kilograma 3,253 tama Timor-Leste liu husi Aeroportu Dili. Imajen/Kontribui husi Nuno Saldanha, jornalista RTTL.Ep

DILI, 15 janeiru 2020 (TATOLI) – Operasaun konjunta entre autoridade seguransa, kompostu husi Alfándega Timor-Leste, Servisu Investigasaun Kriminál Nasionál  (SIKN), Servisu Informasaun Polísia (SIP), Servisu Nasionál Intelijénsia (SNI), Polisia Militár no Unidade Polísia Marítima (UPM), ohin, detein Timoroan ida ho inisiál CMB iha Aeroportu Dili, tanba diskonfia lori ai-moruk droga ho tipu sabu-sabu ho nia kuantidade kilograma (kg) 3,253  tama Timor-Leste.

Autoridade Seguransa halo identifikasaun ba ai-moruk droga ho tipu sabu-sabu kilograma 3,253 ne’ebé solda metin iha kompresór ida nia laran. Imajen/Kontribui husi Nuno Saldanha, Jornalista RTTL.Ep

Autoridade sira Timor-Leste konsege deteta  droga tipu  sabu-sabu  lori to’o Timor-Leste iha loron 6 janeiru  2020 ne’e  liuhusi Aeroportu Internasionál Nicolau Lobato, Dili.

Informasaun ne’ebé Ajénsia TATOLI sita husi RTTL.E.p, ohin, haktuir autoridade seguransa sira deteta suspeitu CMB ne’ebé servisu iha kompañia ida iha Timor Plaza atu ba foti pakote sasán hanesan pesa kompresór ne’e iha Aeroportu maka sira detein kedas suspeitu no apreende sasán nu’udar evidénsia ne’ebé suspeitu ba foti.

Hafoin detein, ekipa konjunta halo kedas identifikasaun no lori kedas suspeitu CMB ho pakote pesa kompresór ba  halo investigasaun kle’an edifísiu Servisu Investigasaun Kriminál Nasionál PNTL.

Tuir informasaun, ai-moruk sabu-sabu ne’e haruka husi nasaun Nijéria  mai Timor-Leste via Ajénsia DHL  iha loron 17 dezembru 2019 ho aviaun Citilink too Timor-Leste iha loron 6 janeiru 2020.

Ai-moruk sabu-sabu ne’ebé autoridade sira apreende husi suspeitu CMB. Imajen/Kontribui husi Nuno Saldanha, jornalista RTTL.Ep

Iha loron 7 janeiru, parte Alfándega iha Aeroportu diskonfia ona no halo kedas city scan maibé labele deteta tanba iha kompresór laran fui ho alumíniu ne’ebé solda metin.

Ekipa seguransa diskonfia suspeitu lori sasán ho modus espedisaun no transportasaun droga ne’e husi Nijéria mai Timor-Leste utiliza pesa karreta nian hanesan kompresór AC (Air Conditioner) ne’ebé ai-moruk droga ne’e hatama tiha iha kompresór ninia laran no solda metin nune’e bele dezvia atensaun autoridade sira, maibé bainhira ekipa konjunta tesi kompresór ne’e konsege deteta no hetan ai-moruk droga ne’e iha kompresór laran no falun metin ho plástiku kór kinur.

Informasaun ne’ebé iha katak  ai-moruk ne’e sei lori sai husi Timor-Leste atu transporta fila fali ba Indonézia liuhusi fronteira terrestre ba Atambua-Indonézia.

Antes ne’e,  iha  outubru 2019, suspeitu  hanesan CMB simu droga no kontinua lori ba entrega sidadaun Indonézia ida iha Atambua ho sistema kontrolu ne’ebé sei frajil no menus ekipamentu kualidade hodi deteta sasán kontra bandu sira  iha ne’e autór rede krime internasionál konsidera Timor-Leste hanesan nasaun tránzitu ba sasán kontra bandu.

To’o notísia ne’e públika, polísia seidauk bele fó sai informasaun detallu no ofisiál tanba sei elabora hela investigasaun profunda ba kazu ne’e.

Jornalista : Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here