Prokuradór Jerál Repúblika, José da Costa Ximenes. Imajen: TATOLI

DILI, 3 setembru 2019 (TATOLI)—To’o oras ne’e, parte justisa Indonézia nian ne’ebé halo investigasaun ba kazu droga kazál timoroan iha Atambua, seidauk fó informasaun ba parte justisa Timor-Leste (TL).

Informasaun ne’e hato’o hosi Prokuradór Jerál Repúblika, José da Costa Ximenes, hafoin enkontru ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Lee mós: Provas Ba Proteje Kazál Timoroan Lori Droga Iha Ona 95%

Ximenes konta tuir katak, antes ne’e, Prokuradoria Jerál Repúblika (PJR) haruka ona Prokuradór Distritál ida ba haree kazál timoroan iha Atambua, iha juñu liubá.

Hafoin vizita, Prokuradór Distritál ne’e submete hela relatóriu ba Prokuradoria Jerál katak bazeia ba enkontru ne’e, desidi matéria ne’e pertense ba Jakarta no la’ós pertense ba Kúpaun, ne’ebé presiza halo investigasaun iha Jakarta (Indonézia).

Tanba ne’e, Prokuradoria Jerál Repúblika foti mós desizaun ida katak PJR tenke halo vizita ida ba Autoridade Justisa Sentrál iha Jakarta, hanesan KAPOLRI (Kepolisian Republik Indonesia) no Ministru Justisa Indonézia.

Rezultadu hosi enkontru ne’e, Autoridade Justisa hosi parte rua aprofunda investigasaun—parte justisa Timor-Leste liuhosi PJR, loke dalan atu bele halo investigasaun konjunta iha Indonézia no Timor-Leste.

“Oras ne’e dadaun kontinua halo investigasaun iha Indonézia no ekipa Indonézia rasik seidauk halo komunikasaun hodi fó informasaun ba parte justisa TL kona-ba prosesu investigasaun ne’e”, Prokuradór Jerál haktuir.

Maski seidauk fó informasaun, maibé parte justisa TL prontu nafatin atu fasilita bainhira ekipa investigadór sira hosi Indonézia presiza rona testemuña ruma hosi Timor-Leste.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here