Diretór Jerál Turizmu, José Filipe Dias Quintas. Imajen Egas/Cristovão.

DILI, 21 janeiru 2020 (TATOLI) – Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, afirma sei iha opsaun barak atu solusiona orsamentu ba Expo Dubai 2020, maski orsamentu ne’ebé prevee iha Gabinete Primeiru-Ministru ho montante millaun $2,1 sumba iha Parlamentu Nasionál iha sesta, (17/01).

“Ita sei haree, opsaun sei barak no dalan mós sei barak, ita tenta no esforsu atu serbisu hamutuk ho setór privadu sira ne’ebé iha kapasidade finanseira atu oinsá sira haree ida ne’e”, Quintas ba Ajénsia TATOLI iha Ministériu Turizmu, Faról, ohin.

Nia rekoñese katak Orsamentu Jerál Estadu (OJE) 2020 ne’ebé la liu iha Parlamentu Nasionál afeta makaas ba Expo Dubai, maibé solusaun sei iha, tanba ne’e, nia husu ba lider sira atu solusiona situasaun polítika iha rai-laran.

“Alternativu maka ita hein, ita labele halo espekulasaun, maibé solusaun barak, ita sei serbisu hamutuk ho setór privadu sira, ezemplu; sira hola artezanatu depois ita lori bá, hafoin ita selu ikus sira-nia osan”, Quintas fó ezemplu.

Nia dehan preparasaun ba Expo Dubai kontinua la’o, tanba ne’e sei diskute ho ministériu relevante sira hodi ko’alia kona-ba produtu sira ne’ebé atu transporta ba, maibé durante ne’e define produtu sira balun hanesan kafé, mina virjen, arteaenatu, masin lokál no seluk tan.

Notísia relevante : Espozisaun Dubai 2020 Sei iha Faze Preparasaun

“Produtu sira ne’e sei iha diskusaun nafatin tanba bazeia ba komisaun organizadora Expo Dubai nian, ita sei transporta produtu sira iha fulan-marsu”, dehan.

Maibé produtu hirak ne’ebé atu lori bá mós iha nia rekizitu katak tenke iha sertifikasaun no parte seluk maka Governu Dubai apoia Timor-Leste ho tipu kontentór, atu transporta produtu sira ho gratuita no fó pavillaun kuaze luan ho metru kuadradu 189 inklui eskritóriu ho gratuita iha Expo Dubai.

“Apoiu kontentór ida gratuita hodi transporta ita-nia produtu lokál atu promove no fa’an liuliu promove turizmu, investimentu, agrikultura, indústria no komérsiu no seluk tan”, afirma.

Notísia relevante : Orsamentu ba Expo Dubai sei Gasta Barak iha Operasionál

Entretantu, espozisaun mundiál ne’e, sei partisipa husi nasaun kuaze 192, ne’ebé sei selebra iha Dubai-Uni Emirat Arab, hahú iha 20 outubru 2020 to’o 10 abríl 2021. Área ba expo ne’e kuaze ektare 438 (1.080 ac) iha Dubai Exhibition Centre.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here