Fatin Espozisaun 2020 iha Dubai. Imajen Tatoli/Rafael Belo

DILI, 24 juñu 2019 (TATOLI)—Diretór Jerál Turizmu no Koordenadór Jerál Expo Dubai 2020 hateten,  Timor-Leste mós sei hola parte iha espozisaun mundiál iha Dubai ne’ebé hanaran Expo Dubai 2020 nu’udar espozisaun mundiál ida ne’ebé boot no espozisaun ne’e hala’o to’o fulan neen nia laran.

Espozisaun Dubai 2020, nia esplika, Timor-Leste agora iha faze preparasaun. Téknikamente sei halo koordenasaun ho ministériu relevante sira liliu saida mak atu halo durante iha espozisaun Dubai 2020 ne’e.

Ba ida ne’e, VIII Governu Konstitusionál ne’ebé lidera hosi Primeiru-Ministru, Taur Matan Ruak, liuhusi reuniaun Konsellu Ministru (KM), Kuarta (12/6/2019), nomea ona eis Ministru Turizmu, Francisco Kalbuadi Lay nu’udar Autoridade Nasionál ba Espozisaun Dubai 2020 iha Dubai, Emiradu Árabe Unidu.

“Liuhusi ami-ni Ministru Koordenadór Asuntu Ekonomia nian, Agio Pereira, mós fó konfiansa mai ha’u nu’udar Koordenador Jerál ba Expo Dubai 2020 no vise mak Eis Diretora Jerál Arte no Kultura, Cecília Assis. Espozisaun mundiál iha Dubai 2020, agora Timor-Leste iha hela faze preparasaun. Ami-nia papél ne’e atu koordena ho ministériu relevante sira atu deskuti maizumenus programa saida mak ita atu halo iha Expo Dubai 2020 ne’e,” dehan Koordenadór Jerál Expo Dubai 2020, José Filipe Dias Quintas, ba Agência Tatoli liuhusi entrevista iha ninia kna’ar fatin, Minstériu Turizmu, Faról, Dili, segunda ne’e.

Téknikamente, nia hatutan, Timor-Leste (TL) rejistadu iha tinan kotuk maibé hakarak akresenta katak Governu Dubai fó apoiu másimu mai Timor-Leste atu partisipa iha eventu ida ne’e. Governu Dubai mós sei fasilita Timor-Leste liliu fó paviliaun gratuitu ba Timor-Leste no sira mós fasilita kontentór ida para TL bele lori nia sasán sira atu lori ba Dubai.

José Filipe haktuir, iha nível tékniku,  hahú kedas iha tinan kotuk (2018) sira halo ona koordenasaun ho ministériu relevante sira hanesan Ministériu Agrikultura ho Peska, hodi ko’alia kona-ba produtu lokál ne’ebé atu promove iha Dubai. Sira mós halo ona koordenasaun ho parte komérsiu nian hodi ko’alia kona-ba sasán indústria nian hanesan artezenatu sira ne’ebé atu promove iha ne’ebá.

Tanba iha espozisaun Dubai 2020 ne’e rasik, nia haklaken, sei foka iha área lubuk ida mak hanesan iha área turizmu nian atu promove Timor-Leste nu’udar destiñu turístiku foun iha Ázia Pasífiku. Hafoin ne’e, sei promove mós kona-ba investimentu entaun hosi parte trade investment mós involve iha laran para bele dada investór sira mai atu investe iha setór oioin.

José informa, orsamentu ne’ebé prevee ba atividade Espozisaun Mundiál iha Dubai 2020 ne’e depende ba atividade no programa ne’ebé ekipa tékniku sira prepara. Orsamentu sei deskuti hela maibé bazeia planu Governu sei prevee purvolta milliaun $1.5. Ida ne’e sei iha planu hela tanba desizaun sei iha autoridade nasionál no sei rona hosi parte sira hotu.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here