Diretór Jerál Turizmu, José Filipe Dias Quintas. Imajen/Tatoli.

DILI, 07 janeiru 2020 (TATOLI) – Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, informa orsamentu ba Expo Dubai 2020 ne’ebé prevee iha Gabinete Primeiru Ministru ho montante millaun $2,1 ne’e sei gasta barak liu iha operasionál durante espozisaun fulan neen.

“Orsamentu millaun $2,1 ne’e, sei gasta barak liu ba operasionál tanba vida iha Dubai mós karun ne’ebé ita presiza orsamentu  no orsamentu ne’ebé prevee mós la signifika gasta hotu karik bele mós to’o no bele mós la to’o, ne’e depende ba serbisu”, Diretór José Quintas ba jornalista sira iha Parlamentu Nasionál, ohin.

Delegasaun Timor-Leste ba Expo, nia dehan komisaun ne’e barak, maibé teknikamente sei haree tanba ekipa interministeriál mak sei hamutuk deside delegasaun na’in hira mak ba Expo Dubai.

“Ita labele fó kalkulasaun ba delegasaun tanba bele mós menus no liu 100 tanba sei hatudu iha dansa kulturál, artezanatu no ekipa ne’ebé hein pavillaun”, katak.

Nune’e, MTKI kontinua halo preparasaun liuhusi koordenasaun ho ministériu relevante sira ba expo Dubai.

Nia afirma, Governu Dubai apoia gratuita pavillaun kuaze luan metru kuadradu 189 no apoia kontentór no eskritóriu ba Timor-Leste.

“Apoiu kontentór ida gratuita hodi transporta ita-nia produtu lokál atu promove no fa’an liuliu promove turizmu, investimentu, agrikultura, indústria no komérsiu no seluk tan”, afirma.

Timor-Leste nia sorte tanba hetan pavillaun, kontentór, eskritóriu gratuita, enkuantu nasaun hotu-hotu selu kustu ba pavillaun ne’ebé karun kuaze millaun $10-resin

“Públiku lahatene orsamentu ne’ebé prevee ne’e dehan boot la halimar, mas nasaun balun hanesan Indonézia prevee millaun $30 ba Expo Dubai nian”, informa.

 José Quintas dehan orsamentu ne’e sei foka liu ba organiza buat lubuk ida, promosaun, iha viajen tanba pavillaun ne’e mós boot ne’ebé pesoál (staff) mós tenke aumenta to’o 30 no sei uza mekanizmu rotativa ka sei troka malu, la’ós fulan neen tomak iha ne’ebá.

Partisipasaun Timor-Leste to’o fulan neen, ne’ebé prepara pesoál sira atu atende vizitante sira tanba iha setór turizmu, investimentu, agrikultura, istória no kultura.

“Ba produtu lokál ne’ebé lori mak kafé, kamii, mina nuu, ai-kameli no ba produtu seluk ne’ebé iha sertifikasaun atu lori produtu ne’ebé iha kualidade no kuantidade ba Expo Dubai”, salienta.

Antes ne’e, Primeiru- Ministru (PM), Taur Matan Ruak, hateten Oitavu Governu Konstitusionál kontinua fó apoia ba partisipasaun Timor-Leste iha espozisaun Dubai iha 2020.

Xefe Governu ne’e dehan tanba partisipasaun eventu internasionál sira bele fó efeitu pozitivu husi rai-li’ur mai Timor-Leste hodi hala’o dezenvolvimentu nasionál.

Espozisaun mundiál ne’e, sei partisipa husi nasaun kuaze 192, ne’ebé sei selebra iha Dubai-Uni Emirat Arab, hahú iha 20 outubru 2020 to’o 10 abríl 2021. Área ba expo ne’e kuaze ektare 438 (1.080 ac) iha Dubai Exhibition Centre.

Notísia relevante : Orsamentu ba Expo Dubai Mantein Millaun $2,1

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here