Diretór Institutu Defeza Nasionál (IDN), Donaciano Costa Gomes "Pedro Klamar Fuik" ho Reitór Universidade Nasionál Timor-Lorosa’e (UNTL), Francisco Miguel Martins, ofisializa kooperasaun ba asuntu kapasitasaun rekursu umanu iha rea defeza no seguransa. Imajen/Egas Cristóvão

DILI, 20 janeiru 2020 (TATOLI) – Institutu Defeza Nasionál Timor-Leste (IDN-TL) ho Universidade Nasionál Timor Lorosa’e (UNTL), ohin, ofisializa kooperasaun hodi kria formasaun ba estudante universitáriu sira iha area defeza no seguransa nasionál.

Notísia Relevante : Forsa Defeza Nova Zelándia Prontu Apoiu IDN

Akordu kooperasaun entre parte rua ne’e aprofunda liuhusi asina memorandum of understanding (MoU) ne’ebé halo diretamente husi Diretór IDN-TL, Donaciano Costa Gomes “Pedro Klamar Fuik” ho Reitór UNTL, Francisco Miguel Martins, ne’ebé asiste mós husi Diretora Ezekutiva Fundu Dezenvolvimentu  Kapitál Umanu (FDCH), Leila M.L. Cárceres dos Santos iha salaun IDN, Palásiu Governu, Dili.

Diretór Institutu Defeza Nasionál (IDN), Donaciano Costa Gomes “Pedro Klamar Fuik”. Imajen/Egas Cristóvão

Pedro Klamar Fuik, konsidera  akordu ne’e marka istória ba IDN-TL no UNTL hodi forma foin-sa’e Timoroan sira nia koñesimentu. Nune’e, IDN mós agradese ho akordu orienta atividade hotu-hotu ne’ebé IDN halo tuir programa kada tinan fó kursu promosaun ba ofisiál superiór defeza no seguransa no kursu ba estadu maiór inkluzivamente kursu intensivu ba joven universitáriu sira.

Iha futuru, dosente sira iha UNTL bele ba hanorin IDN no intelektuál sira husi IDN mós bele ba hanorin iha UNTL hodi troka esperiénsia ba malu.

Notísia Relevante : IDN Oferese Formasaun Empreendedorizmu Ba Emprezaríu Nasionál

“Ho akordu ida ne’e intensifika liu IDN nia atividade iha UNTL, nune’e mós UNTL iha IDN bele haree rekursu espesialidade hanesan dosente bele troka entre instituisaun rua, nune’e mós sílabu sira ne’ebé iha bele troka, no IDN sei hetan privilejiadu ida husi UNTL hodi fó diploma ba estudante sira ne’ebé sei tuir kursu,” nia hatete.

Durante IDN harii, husi 2013 too mai agora, IDN fó ona formasaun ba membru F-FDTL, PNTL, setór privadu, xefe suku 452, sosiedade sivíl no estudante universitáriu sira kuaze  ema1.000-resin.

IDN mós kada tinan sempre bolu oradór internasionál sira husi Amérika, Portugál, Austrália no nasaun seluk hodi fahe esperiénsia ba Timoroan sira.

Diretór IDN Pedro Klamar Fuik hatutan, objetivu prinsipál seluk husi formasaun sira ne’e maka sensibiliza no aprofunda koñesimentu ba autoridade lokál no estudante sira hodi hatene temátika haat (4) hanesan, seguransa no defeza, ambiente no protesaun sivíl/bombeiru, haree tuir planu seguransa no defeza nasionál.

Iha fatin hanesan, Reitór UNTL, Francisco Miguel Martins hato’o agradese, tanba akordu ne’e importante atu forma rekursu joven Timoroan ho kualidade.

“Ita hakarak fortifika rekursu umanu ba joven nasaun ne’e importante tebes atu eleva sira nia kompeténsia, matenek kona-ba defeza no seguransa nasionál, atu nune’e, sidadaun hotu-hotu tau responsabilidade ba étika polítiku atu halo defeza nasionál ba nia pátria,” dehan Reitór Francisco.

UNTL agradese ho akordu ne’e ba oin ho rekursu ne’ebé UNTL sei fó kapasitasaun ba joven Timoroan sira atu sai matenek.

Nia dehan, UNTL hakiak hela joven matenek barak ne’ebé sai futuru ba nasaun ne’e tenke prepara sira nia-aan atu estuda, no sai estafeta ba prosesu dezenvolvimentu nasaun ba oin.

Matéria Defeza no Seguransa Tama Kurríkulu UNTL

Diretór Institutu Defeza Nasionál (IDN), Donaciano Costa Gomes (Pedro Klamar Fuik) ho
Reitór Universidade Nasionál Timor Lorosa’e (UNTL), Francisco Miguel Martins hamutuk Diretora Ezekutivu ba Fundu Dezenvolvimentu Kapitál Umanu (FDCH), Leila Carceres dos Santos, estabelese askordu kooperasaun ba asuntu rekursu umanu. Imajen/Egas Cristóvão

UNTL mós iha ona hanoin, ba futuru sei hatama matéria foun kona-ba área Defeza no Seguransa Nasionál iha kurríkulu UNTL hodi bele hanorin estudante sira futuru.

Reitór Francisco dehan, matéria defeza no seguransa importante tebes ba joven universitáriu sira presiza aprende hodi fó kontribuisaun ba polítika Timor-Leste.

 “Matéria dixiplina ida ne’e sei hatama kurríkulu nu’udar dixiplina tranzversál ba estudante hotu- hotu. Tanba sira joven futuru nasaun ita forma sira nu’udar kuadru ba prosesu dezenvolvimentu Timor-Leste no joven sira sei asegura futuru Timor-Leste,” nia hatete.

Iha  abríl 2020 agora, UNTL sei halo renovasaun kurríkulu universidade nian hodi hatama tan matéria defeza no seguransa nasionál ba kurríkulu UNTL nian.

“Abril ami halo reforma ba kurríkulu, tinan 2021 ita bele implementa ona,” nia hateten.

Ho matéria foun ne’e, Reitór Francisco fiar sei hametin liután estudante sira nia patriotizmu, responsabilidade, kuidadu nasaun ne’e ho sira nia rekursu umanu.

Biban ne’e, Diretora Ezekutiva Fundu Dezenvolvimentu Kapitál Umanu (FDCH), Leila M.L. Cárceres dos Santos, apresia ho akordu ne’ebé asina no FDCH sei apoiu fundus hodi fó susesu ba kapasitasaun rekursu umanu iha área defeza no seguransa.

“Ami fiar katak, akordu ne’e importante tebes, hodi forma ita nia rekursu umanu ho kualidade atu kontribui ba ita nia dezenvolvimentu rekursu umanu nasionál,” dehan Leila iha diskursu.

FDCH sei prepara orsamentu hodi aloka ba prosesu formasaun ne’ebé sei hala’o. Tanba papél FDCH nian atu asegura jestaun finanseira investimentu públiku nian  ba área dezenvolvimentu rekursu umanu nasionál.

Serimónia ne’e remata ho entrega prenda husi IDN ba UNTL no FDCH nu’udar sinál agradesimentu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here