Diretór IDN, Donaciano Costa Gomes, Pedro Klamar Fuik. Imajen hosi google

DILI, (TATOLI) – Institutu Defeza Nasionál (IDN) oferese formasaun empreendedorizmu ba emprezáriu nasionál hamutuk 20 durante loron neen iha Dili ho objetivu kapasita emprezáriu sira sai profisaun nu’udar empreendedór profesionál hodi apoiu prosesu dezenvolvimentu.

Tema hosi formasaun ne’e maka “Kursu Espesialidade ba Dezenvolvimentu Nasionál no Empreendedorizmu” ne’ebé hala’o iha sala auditória IDN iha Pateo, ohin.

Diretór IDN, Donaciano Costa Gomes koñesidu ho Pedro Klamar Fuik, hatete papél institutu la’ós de’it haree ba asuntu defeza seguransa maibé mobiliza rekursu Estadu nian hodi apoiu interese nasionál.

Nia haktuir rekursu Estadu ne’e kompostu hosi pólitika, diplomátiku, ekonómiku, militár, polisiál, kulturál, teknolojia, tanba ne’e hanoin katak tenke tulun Estadu hodi hakbiit mós ekonómia iha rai-laran.

“Kursu ida ne’e atu fó motivasaun no sai hanesan fatór estimuladór ba ita nia emprezáriu sira hotu sobre oinsá maka bele hanoin área empreendedór hanesan profisaun para sai empreendedora no empreendedór profisional”, katak pedro Klamar Fuik.

Nia hatete kursu ne’e fahe ba parte rua; teoria no prátika atu oinsá tulun emprezáriu nasionál hodi kria empreza iha rai-laran no sai empreendedór no empreendedora. Atu apoiu prosesu dezenvolvimentu nasionál, nia konsidera papel setór privadu fundamentál.

Iha biban hanesan, Prezidente Kámara Komérsiu Indústria Timor-Leste (CCI-TL sigla portugés), Oscar Lima, orgulu ho IDN, tanba iha hanoin di’ak hodi kapasita emprezáriu nasionál sira.

“Ha’u orgullu institutu hanoin mós emprezáriu sira no la hanoin de’it ba militár sira, maibé hanoin mós ba ekonomia iha rai-laran”, dehan emprezáriu timoroan ne’e.

Hosi formasaun ne’e Prezidente CCI-TL espera sei tulun emprezáriu sira atu sai empreendedór profisionál hodi apoiu dezenvolvimentu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here