DILI, 29 agostu 2019 (TATOLI)Forsa Defeza Nova Zelándia deklara sira nia kompromisu kontinua fó apoiu formasaun ba Institutu Defeza Nasionál Timor-Leste (IDN-TL).
Kometimentu ne’e hato’o husi Xefe Delegasaun Militár Nova Zelándia, Kapitaun de Mar-Guerra, Shaun Fogarty ho nia ekipa durante hala’o vizita kortezia hasoru malu ho Diretór Institutu Defeza Nasionál, Donaciano Costa Gomes ho ekipa iha IDN iha Palásiu Governu, Dili, Kuarta (28/08/2019).
Kapitaun, Shaun Fogarty hala’o vizita ba IDN hodi haree direita instalasaun no Kursu Promosaun Ofisial Superiór (KPOS) no Curso de Pós-graduação em estudos Estratégicos e Resiliência Nacional (PGEERN) ba estudante hamutuk na’in 41 kompostu husi membru F-FDTL na’in 17 no membru PNTL na’in 23 no sivíl ida (1).
Asesór Militár Nova Zelándia, Tenente Koronél Martin Dransfield informa, vizita ba IDN importante tebes, tanba ba futuru Nova Zelándia sei apoiu formasaun ba F-FDTL, PNTL no IDN.
“Ba Futuru Ministériu Defeza Nova Zelándia iha kometimentu, apoiu formasaun ba ofisial F-FDTL ho PNTL, iha Timor-Leste inklui formasaun sira iha IDN, liu husi ami nia koordenasaun, alunu sira mós bele halo vizita Estudu ba Nova Zelándia,” dehan Tenente Koronél Martin Dransfield.
Iha fatin hanesan, Diretór Servisu Akademia, Guilherme Soares hato’o agradese ba Ministériu Defeza no Forsa Armada Nova Zelándia ninia apoiu ba Timor-Leste iha setór defeza no seguransa.
“Programa mak ita bele koopera ho sira iha futuru mak bazeia ba Planu Estratéjiku Dezenvolvimentu Nasionál (PEDN) 2011-2030 no hatuur mós iha planu estratéjiku IDN 2018-2022 hanesan iha área ensinu no formasaun, peskiza, vizita estudu, no partisipa konferénsia internasionál sira ne’e”.
Guilherme dehan, programa ne’ebé IDN aprezenta maka ba oin sei troka esperiénsia entre dosente sira vizita estudu husi alunu sira nune’e mós alunu husi IDN bele mós partisipa iha formasaun ne’ebé sira hala’o iha Nova Zelándia.
Jornalista : Eugénio Pereira
Editór : Francisco Simões
