Sekretáriu Estadu ba Protesaun Sivíl, Alexandrino de Araújo. Imajen/António Gonçalves

DILI, 08 janeiru 2020 (TATOLI) – Primeiru-Ministru, Taur Matan Ruak hala’o sorumutuk urjénsia ho Ministáriu Obra Públika (MOP), Ministériu Administrasaun Estatal (MAE) no Sekretaria Estadu Protesaun Sivíl (SEPS), hodi serbisu hamutuk apoiu vítima dezastre naturál ne’ebé akontese iha rai-laran.

“Ohin ami mai hasoru malu ho Primeiru-Ministru tanba bolu ami urjente hodi halo koordenasaun kona-ba dezastre ne’ebé akontese foin dadauk. Ko’alia mós kona-ba koordenasaun liña ministeriál hodi fó apoiu urjénsia hodi normaliza fila-fali dalan no ponte ne’ebé foin lalais a’at tanba dezastre naturál”, tenik Sekretáriu Estadu Protesaun Sivíl, Alexandre de Araújo iha Palácio do Governo, kuarta ne’e.

Nia dehan, dadus ne’ebé parte tékniku rekolla kona-ba dezastre naturál ne’ebé akontese iha 2019, konsege ajuda ona família vítima hodi konstrui uma ne’ebé a’at hamutuk 3698.

“Kona-ba estragu ne’ebé akontese iha outubru 2019, dadus konstrusaun ne’e iha 717. Ida foin lalais akontese iha loron 29 no 30 dezembru 2019, apoiu emerejénsia ne’ebé fó ba família vítima sira ne’e hamutuk 25 xefe família”, akresenta Governante ne’e.

Nia esplika, relasiona ho orsamentu ne’ebé atu fó apoiu ba família vítima sira, iha ona mekanizmu rua hanesan planu orsamentu annuál atu responde ba dadus ne’ebé iha ona no bainhira dezastre balun mosu, orsamentu ne’ebé iha labele kobre.

Tanba ne’e, durante enkontru sira nia parte ko’alia ona ho PM Taur oinsá bele buka dalan atu apoiu orsamentu ba dezastre ne’ebé akontese maibé seidauk responde iha dadus.

“Ho preokupassun sira ne’e hotu, Primeiru-Ministru nia orientasaun klaru ona katak ami tenke haree dadus ne’ebé iha hodi submete karta ba finansa, nune’e bele foti apoiu hosi fundu kontijensia”, nia subliña.

Entretantu, orsamentu ne’ebé Governu apoiu ba vítima afeitadu ba dezastre naturál iha tinan 2019 hamutuk 6.000.

Jornalista: Hortênçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here