DNTT-PNTL sei Kontrola Viatura Para La Tuir Fatin

DILI, 15 janeiru 2020 (TATOLI) – Xefe Departamentu Sinál Tránzitu Diresaun Nasionál Transporte Terrestre (DNTT), João Eugénio, hateten DNTT no Polísia Nasionál Timor-Leste (PNTL) sei kolabora hodi kontrola viatura sira ne’ebé para la tuir fatin ne’ebé prepara ona.

“Dala barak motorista sira para karreta arbiru la tuir sinál tránzitu ne’ebé maka iha, ita haree balun bá para tan iha zebra cross leten no para sa’e ba trotoár nia leten, tuir loloos ida ne’e labele no viola ona lei kódigu estrada”, nia dehan ba Ajénsia TATOLI iha Balidi, ohin.

Tanba ne’e, DNTT ho PNTL sei toma medida hamutuk ba karreta ho motór ne’ebé para la tuir regra no atu evita ida ne’e, parte rua ne’e sei deside hamutuk.

“Ami sei haree hamutuk medida saida maka ami sei foti ba oin, bainhira motorista sira kontinua. Tanba ne’e maka loraik (ohin) ami sei deside, tanba ita tenke kumpre regra tránzitu sira”, dehan.

Durante ne’e, DNTT monta ona fatin estasionamentu sira iha Dili laran, maibé motorista no kondutór sira maka ladauk iha konsiénsia atu para tuir fatin, ho nune’e maka desizaun hosi parte DNTT no PNTL sei hola asaun ba kestaun hirak ne’e tuir rezultadu reuniaun.

Foin lalais ne’e, Polísia  Nasionál Timor-Leste (PNTL) Munisípiu Dili trasa ona ajenda, atu tun direta bá terrenu hodi sensibiliza regra ba públiku, liuliu motorista sira, oinsá utiliza fatin estasionamentu.

Notísia Relevante : Maioria Utilizadór La Kompriende Estasionamentu

Polísia rekoñese durante ne’e públiku sira la sensitivu ba sinál estasionamentu entre karreta no motór nian, mezmu Estadu kria ona kondisaun, maibé sosiedade sei menus koñesimentu.

“Ita sei sensibiliza regra utiliza fatin estasionamentu sira ne’ebé ita-nia Diresaun Nasionál Transporte Terrestre (DNTT) rasik monta para públiku liuliu motorista sira tenke kumpre hodi  para karreta ho motór”, Segundu  Komandante PNTL Munisípiu Dili, Superintendente Asistente Euclides Belo, ba jornalista iha nia knaar fatin, kinta (09/01/2020).

Sensibilizasaun ne’e sei hala’o direita husi Polisia Tránzitu Dili, Ofisiál Estasionamentu no Ekipa DNTT.

Notísia Relevante : Munisípiu Dili Rekolla $59.107.65 Hosi Taxa Estasionamentu

DNTT monta ona sinál tránzitu no regra kompletu iha fatin estasionamentu sira iha Audian, Colmera, Vila-Verde, Portu Dili, Bemori ho Merkadu Taibesi nian, maibé públiku barak kontinua para transporte la tuir regra.

“Ita hakarak orienta para ita-nia motorista sira bainhira lori karreta tenke para iha fatin karreta nian, la’ós para fali iha motór nian fatin, nune’e mós ba motór para iha motór nia fatin”, Euclides dehan.

Hafoin hala’o tiha sensibilizasaun maka públiku sira kontinua viola regra, Euclides afirma, Polísia sei halo kontrolu no fó infrasaun ba motorista sira hodi selu multa.

PNTL rasik halo analiza iha kapitál Dili agora kada loron husi dadeer, loro-manas no lokraik sei mosu engarrafamentu iha fatin balun, tanba públiku utiliza transporte para arbiru de’it.

Jornalista : Natalino Costa 

Editora : Maria Auxiliadora