Adjuntu Prezidente Autoridade Munisípiu Dili, José Filipe Ximenes Smith. Imajen/TATOLI

DILI, 02 dezembru 2019 (TATOLI)-Adjuntu Prezidente Autoridade Munisípiu Dili, José Filipe Ximenes Smith, informa, durante  janeiru to’o outubru 2019, Munisípiu Dili rekolla ona $59.107.65 hosi taxa atividade estasionamentu transporte (karreta ho motor).

“Ba fulan-novembru, ami seidauk simu relatóriu ho osan hosi ekipa estasionamentu, maibé ekipa sei entrega iha loron ikus kada fulan,”  informa Adjuntu Autoridade Munisípiu Dili ne’e, ohin, ba TATOLI iha ninia servisu fatin, Matadoru, Dili.

Notísia Relevante : Taxa Estasionamentu Merkadu Taibesi Tun

Administradór Postu Administrativu Interinu Dom Aleixo ne’e  informa liután, durante dezembru 2019 sei ofisializa hodi lansa fatin estasionamentu iha Audian, Colmera,Villa-Verde, Merkadu Taibesi no seluk tan.

Notísia Relevante : Governu La Responsabiliza Sasan Lakon Iha Zona Estasionamentu

Nia dehan, objetivu hosi lansamentu atu fó koñesimentu ba públiku liuliu ba motorista sira, oinsá atu kumpre no kontribui osan ba kofre estadu.

Smith dehan, kada transporte tenke kontribui osan hosi $0.10 to’o $0.50 tuir tipu transporte, transporte pezadu (karreta boot) selu $0.50, Angguna $0.25, taxi, mikrolete ho motor selu $0.10.

Tuir Nia durante ne’e Munisípiu Dili koloka pesoál hamutuk 50 no supervisor jerál hamutuk neen maka servisu hodi halo kobransa ba karreta no motor.

Ba futuru, Munisípiu Dili sei koloka tan koordenadór jerál na’in-ida hodi halo kontrolu ba funsionamentu fatin estasionamentu sira iha Dili.

Adjuntu Prezidente Autoridade Munisípiu Dili, José Filipe Ximenes Smith, realsa nia parte sei koordena ho Polisia Nasionál Timor-Leste (PNTL) atu fó apoiu ba ekipa kobransa hodi garante funsionamentu ba fatin estasionamentu sira ho di’ak liután.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here