Eis Espoza Prezidente Repúblika, Kirsty Sword Gusmão. Imajen Tatoli/Evaristo Soares Martins

DILI, 13 janeiru 2020 (TATOLI)- Fundadora Fundasaun Alola, Kirsty Sword Gusmão hasoru malu ho médiku espeliasta kankru susun, Alito Soares ho objetivu hodi oferese formasaun ba profisionál saúde sira kona-ba jestaun komplikasaun moras kankru susun nian.

Formasaun ne’e oferese liuhusi programa Fundasaun Alola nia ho naran “Ha’u Hili Atu Kura-Haliku” ho funsaun mak atu eduka feto maluk sira ne’ebé mak iha sintoma kankru susun tanba feto barak mak sofre ona moras ne’e, liliu inan-feton sira iha área rurál tanba menus informasaun kona-ba sintoma moras kankru susun ne’e.

“Dalaruma  sira  hakbesik aan ba sentru saúde ne’ebé  besik maibé sira prefere liu mak ai-moruk tradisionál ne’ebé uza ho tempu naruk ona entaun todan ona mak sira mai Alola, halo transfere ba ospitál. Depois mai ho kondisaun todan,  entaun ita labele halo buat barak tan ba sira,” hateten Fundadora Alola Kirsty Sword Gusmão ba media sira iha Ospitál Nasionál Guido Valadares (HNGV), ohin.

Notísia relevante:Livre Hosi Kankru Susun, Labele Moe Ko’alia ba Malu

Nia dehan, hanesan sobrevivente kankru susun nia parte sente triste tebes haree situasaun ne’e. “Ha’u sente progresu sei barak no ita-nia servisu sei naruk no mós iha esperansa boot katak ho kolabarasaun ne’ebé mak  di’ak neineik, ita-nia feto maluk sira sei hetan atendimentu másimu”.

Prezidente Fundasaun Alola ne’e haktuir, durante tinan lima Fundasaun Alola kolabora di’ak ho Ministériu Saúde (MS) liliu HNGV hodi ajuda pasiente kankru susun hodi bele hetan lalais asisténsia médika no informasaun edukasaun ne’ebé sira presiza hodi bele kura sira-nia saúde.

“Moras kankru ne’e  hamutuk atus tolu resin dezde tinan 2015 to’o agora maibé ita hatene katak ita-nia fasilidade sira limitadu tebes iha ita-nia rai laran tanba ne’e mak dalaruma ita haruka ita-nia pasiente balun, ita haruka ba rai li’ur hodi simu tratamentu kimioterapia nian”.

“Ha’u espera katak iha tempu badak mai ita sei iha fasilidade di’ak liu iha rai laran para ita labele gasta osan barak hodi  ba  iha rai li’ur de’it  hodi simu traramentu maibé ita mós iha ona espesialista  para neneik hodi hadi’a ita-nia fasilidade no koñesimentu sira  ho di’ak,” nia espera.

Notísia relevante:Kankru Susun Bele Hamate Ema

Tanba ne’e, iha biban hanesan, nia parte mós agradese ba Fundasaun Alola nia ekipa liliu ba programa “Ha’u hili atu kura-Haliku” bainhira iha pasiente ruma ne’ebé  presiza asisténsia médika hodi transfere lalais atu nune’e doutór sira bele ajuda.

Nia mós konsidera katak dala balun inan-feton sira hili liu ai-moruk tradisionál  tanba sira la iha koñsimentu ba sintoma kankru tanba ne’e mak sira hanoin katak ne’e la’ós moras sériu ida maibé  sira hanoin katak moras ki’ik-oan de’it entaun tanba ne’e mak sira hili liu ai-moruk tradisionál. Entaun, ida ne’e problema falta koñesimemtu no edukasaun  ba sira.

Maibé ita hatene ita-nia feto  maluk iha área rurál  la asesu duni ba informasaun sira no mós dalaruma sira la iha transporte públiku no osan la iha atu selu transporte sira atu ba sentru saúde hodi hala’o tratamentu.

Entaun ida ne’e mós  iha aspetu ida  no Haliku mós rekoñese limitasaun sira ne’e no i mós koko ajuda osan trasporte  ba feto maluk sira ne’ebé la iha duni kapasidade atu kobre sira-nia transporte rasik banhira ita  koko haree tipu kankru saida mak sira hetan. Ida ne’e mós presiza orsamentu boot, entaun Haliku mós ajuda.

“Tanba ne’e mak dahuluk Fundasaun Alola mak sai parseiru ba Governu nian ne’ebé mak hodi hasoru luta ba  ida ne’e”.

Notísia relevante:Pasiente Kankru Susun Joven Idade Reprodutiva Hamutuk 45%

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here