Sensibilizasaun kona-ba moras kankru susun. Foto: TATOLI

DILI, 16 outubru 2019 (TATOLI)-Fundasaun Alola liuhusi sub-programa Haliku sensibiliza ba Alumni Parlamentu Foinsa´e (APFTL) kona-ba moras kankru susun hodi hasa´e koñesimentu no konsiénsia hodi halo detensaun sedu ba aan rasik inkluzivamente moras kankru susun ne´e.

“Tanba ita hatene katak kazu ne’ebé rejistu aas iha Ospitál Nasionál Guido Valadares ne’e hamutuk 45%, ida ne’e mesak joven idade reprodutiva,” dehan Diretora Interina Fundasaun Alola, Maria Imaculada Guterres ba mídia sira bainhira hala´o serimonia Pink Outubru, iha Maskacarenhas, Dili, kuarta ne´e.

Nia esplika, iha nasaun avansada ne´e bainhira feto sira kankru susun ne´e maioria idade 40 ba leten maibé iha Timór ita identifika mak mesak idade joven; 18 no 19. Ita dehan katak tinan 35 ne’e sofre moras kankru barak.

Tanba ida ne´e, Fundasaun Alola liuhusi Sub Programa Haliku konsidera importate mós hodi fahe informasaun ba joven sira atu koñese sinál (sintoma) moras kankru no oinsá nia detesaun sedu ba aan rasik.

Nune´e mós, ezaminasaun regulár mensalmente ba sira-nia aan rasik atu hatene sintoma, normál ka la normál, iha sira-nia isin-lolon, hodi nune´e bele ba lalais iha fasilidade saúde ne´ebé mak besik.

“Ita Timór kultura moe, lakohi hatudu aan ba médiku ka pesoál saúde sira barak liu hatomana an iha uma de´it depois grave liu ona mak foin halai ba ospitál no barak liu mak halai ba ai-moruk lokál sira ne’ebé ita hatene katak labele garantia salva vida uainhira to´o ospitál sira tarde ona, entaun doutór sira labele salva sira-nia vida,” konsidera ezekutiva interina, Fundasaun Alola.

Tanba ne´e, tuir Diretora Maria Imaculada Guterres, importante hodi fahe informasaun ba APFTL atu nune’e sira mós iha koñesimentu kona-ba moras kankru susun liuliu hatene no detensaun sedu ba aan rasik atu garante salva vida.

Diretora Maria Imaculada Guterres informa tan katak atividade sensibilizasaun kona-ba moras kankru susun ne´e, Alola Fundasaun liuhusi Sub Programa Haliku hanoin katak fulan outubru mundu tomak tau atensaun katak hasa´e konsiénsia moras kankru nian.

“Pink October”  eh fulan outubru korderoza símbolu atu apoiu ba moras kankru sira prinsipalmente halo edukasaun hodi hasa’e konsiénsia kona-ba importánsia detesaun sedu ba moras kankru susun.

Tanba ne’e mak Fundasaun Alola hamutuk ho Komité Kankru susun la´ós halo atividade iha ne’e no halo mós iha loron 2 outrubu, lansa mós video kankru susun iha ospitál no mós iha dia 4 iha Tibar halo mós ba kompañia sira ne’ebé serbisu iha Portu Tibar.

Iha loron 16, ba APFTL. Haliku nia alvu la´ós ba komunidade deit maibé enjerál ba sosiedade sivil, parte instituisaun governu estudante sira liuliu grupu joven sira ne’ebé hatene katak sira mak futuru nasaun nian entaun sira tenki saúde diak bele garantia sira-nia saúde ba dezenvolvimentu nasaun ida ne’e nian.

Nia adianta, Fundasaun Alola nia alvu loloos ne’e ba feto, la signifika katak la´ós ba de´it joven feto maibé kualker feto Timór hotu ne’ebé idade reprodutivu no idade ne’ebé la produtivu  tanba kankru susun mosu la fihir idade.

Nasaun avansadu, idade 40 itál mak afeta moras kankru susun maibé iha ita-nia rai, barak liu kazu sira ne’e iha mós idade reprodutivu mak barak.

Fundasaun Alola nia polítika mak alvu sira ne´e ba joven feto sira no mós inan feton sira iha área rurál, tantu sira sei eskola depois sai hanesan feto sira ne’ebé servisu iha instituisaun sira no mós ba to´o iha igreja no konkregasaun madre sira tanba ita hatene katak fatór risku sira hanesan ema sira ne’ebé la ko´us.

“Ida ne’e mos sai fatór ida tanba ne’e mak ami mós halo sensibilizasaun ba to iha madre sira tanba ne’e mak kankru mai la´ós ba feto de´it maibé ba mós joven mane sira, aman sira, ami mós iha edukasaun ba kankru susun ninian,” nia haktuir.

Diretora Interina, Maria Imaculada Guterres relata mós katak Fundasaun Alola halo ona aproximasaun no edukasaun ba ema kuaze rihun 18.

Sira halo iha nivel suku, aldeia mai to´o iha eskola sira no mós ba grupu joven sira ne’ebé sira indetifika iha nivel nasionál no mos iha suku.

Nune´e mós, iha instituisaun balun hanesan SEFOPE, Fokupers, hamutuk ho espoza Prezidente Repúblika, Cidalia Nobre Mouzinho.

Sensibilizasaun ne´e hala´o mós iha, instituisaun PNTL (Polísia Nasionál Timor-Leste), F-FDTL (Falintil-Forsa Defeza Timor-Leste), instituisaun relijioza, mídia no envolve mós sobrevivente moras kankru susun sira atu bele fahe esperiénsia no motivasaun ba feto maluk sira.

Katak, banhira feto maluk sira hetan moras ida nee tenke fo fiar ba ita-nia pesoál saúde sira ita-nia ospitál ne’ebé eziste iha ne’e atu nune’e atu atende tanba barak mak halai liubá ai-moruk lokál sira ne’ebé la garantia no la salva sira-nia vida.

Notísia relevante:Livre Hosi Kankru Susun, Labele Moe Ko’alia ba Malu

Ministeriu Saúde Lansa Video Edukativu Kona-Ba Kankru Susun

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here