Vise Prezidente Komisaun Organizadora Rekrutamentu F-FDTL, Nuno de Carvalho dos Santos. Imajen/Eugénio Pereira

DILI, 07 janeiru 2020 (TATOLI) – Ekipa Komisaun Rekrutamentu Konjuntu Ministériu Defeza ho Komandu FALINTIL-Forsa Defeza Timor-Leste (F-FDTL),  segunda (06/01/2020), dezloka ona ba munisípiu 12 inklui Rejiaun Administrasaun Espesiál Oe-Cusse Ambeno (RAEOA) hodi rekolla formuláriu ba vaga rekrutamentu F-FDTL  nian.

Notiísia Relevante : Komisaun Rekrutamentu F-FDTL Sei Fahe Formuláriu Too 22,000

“Hahú loron 6 too loron 23 janeiru 2020, ekipa konjunta dezloka ona ba munisípiu hotu-hotu hodi rekolla fila formuláriu sira ne’ebé distribui direita ba iha suku-suku, inklui formuláriu ne’ebé aplikante sira mai foti direita iha Kuartél Jenerál F-FDTL,” informa  Vise Prezidente Komisaun Organizadora Rekrutamentu F-FDTL, Nuno de Carvalho dos Santos ba Ajénsia TATOLI iha Ministériu Defeza, Fatuhada, Dili, tersa (07/01/2020).

Atuál Diretór Jerál Administrasaun Ministériu Defeza ne’e kontaktu ekipa konjunta halo koordenasaun di’ak tebes ho autoridade suku, veteranu no komunidade sira hodi kontribui entrega ona vaga ne’ebé joven feto-mane sira prienxe no hodi tama ba iha sede suku hotu- hotu.

Notísia Relevante : Rekruta F-FDTL Foun, Presiza iha Atensaun Sériu ba Teste Psikolojia

Hafoin rekolla vaga ne’e, komisaun sei lori mai Dili no presiza tempu sufisiente hodi halo selesaun ba dokumentu hotu-hotu ne’ebé kandidatu sira prienxe tuir rekizitu ne’ebé fó sai antes ona.

Durante prosesu rekrutamentu loke vaga too taka, komisaun rasik distribui formuláriu hamutuk rihun 21.

Atu halo selesaun ba dokumentu sira ne’e, komisaun rekrutamentu koopera mós ho liña ministeriál sira hanesan, Ministériu Justisa liuhusi Diresaun Nasionál Notariadu, Igreja Katólika, Polisia, Ministériu Administrasaun Estatál (MAE) no Ministériu Edukasaun hodi haree prosesu dokumentu sira ne’ebé kandidatu sira hatama karik ema ruma falsifika sira bele identifika ho kuidadu.

Notísia Relevante : Governu Aprova Rekrutamentu Soldadu F-FDTL Na’in-600 ba Tinan Oin

Tuir nia, mezmu sistema servisu iha Timor-Leste seidauk integradu didi’ak, maibé ekipa halo koordenasaun ho entidade sira ne’ebé temi atu hodi asegura ba prosesu rekrutamentu bele la’o ho susesu no transparente.

Hafoin halo selesaun ba dokumentu kompleta ona, komisaun sei fó sai lista naran liuhusi publisidade iha mídia. Komisaun mós fó prazu karik iha kandidatu ruma kuandu la satisfás ho prosesu rekrutamentu sira bele hato’o reklamasaun ba komisaun hodi halo esplikasaun.

Prosesu ikus liu maka, komisaun sei hili de’it ema na’in 600 hodi halo teste médiku hodi haree kandidatu sira kondisaun fíziku, saúde, mentalidade, psikolojia, teste psikiatria. Hafoin teste hotu, faze ikus maka simu kandidatu sira ba tuir treinamentu.

 Jornalista: Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here