Rama Ambon Imajen/Agapito dos Santos

DILI, 29 dezembru 2019 (TATOLI)-Konflitu entre joven sira iha área Karantina, Aldeia Terra-Santa, Suku Madohi, Postu Administrativu Dom Aleixo, Munisípiu Dili, iha sábadu kalan (28/12), rezulta membru FALINTIL-Forsa Defeza Timor Leste (F-FDTL) ho naran Tome Lemos, husi Komponente Navál hetan kanek iha kotuk laran tanba sona husi joven balun.

Akontesimentu asaltu malu entre grupu juventude ne’e, mais au menus, tuku 08:00 kalan OTL, ne’ebé rezulta vítima husi Forsa F-FDTL ne’e hetan sona husi joven balun. Vítima nia prezensa iha fatin refere atu vizita família, maibé seidauk to’o iha família nia uma, nia tama iha konflitu laran hodi tuun observa no akalma, maibé derrepente joven balun husi kotuk lori kro’at sona kedas iha nia kotuk laran.

Notísia Relevante:Domingu kalan, Grupu Ilegál Taa Kanek Forsa Espesiál F-FDTL Ida

Kalan ne’e kedas komunidade sira evakua vítima nu’udar membru F-FDTL ne’e ba Ospitál Nasionál Guido Valadares (HNGV-sigla portugés) hodi hetan tratamentu intensivu.

Konfrontu fíziku ne’e rezulta mós komunidade Lourdes Torezao, nia karreta taxi ho númeru matríkula 34.257 nia vidru rahun tanba estragus husi joven deskoñesidu sira.

Polisia Nasionál Timor-Leste Eskuadra Comoro, Batallaun Orden Públika (BOP), Forsa Rezerva, Task Force, FALINTIL-FDTL no Polisia Militár halo kedas atuasaun rápida no konsege akalma situasaun hodi  prende mós família ida, kompostu husi la’en ho inisiál J.P ne’ebé durante ne’e hanesan membru Konsellu Polisiamentu Suku Mahodi nian, fen ho inisiál C.M.C no oan inisiál A.J.S, ne’ebé deskonfia sai autór prinsipál ba kazu konfrontu ne’e.

Notísia Relevante:Taa Membru F-FDTL, CB Tama Prizaun Preventiva no Na’in Haat Hetan TIR

PNTL Munisípiu Dili daudaun ne’e detein ona família ne’e iha sela Polisia Caicoli Dili hodi submete ba investigasaun profunda.

Iha atuasaun PNTL ho F-FDTL nian ne’e konsege rekolla sasán kro’at balun nu’udar evidénsia iha família ne’e nia uma. Sasán kro’at hirak ne’e mak hanesan kris tolu Ho rama ambon hamutuk sanulu.

Lourdes Torresão, ne’ebé sai mós vítima ba kazu ne’e lamenta tebes. Nune’e, nia husu ba autoridade kompetente atu prosesa autór sira tuir lei mak vigora iha Timor-Leste.

 “Sira maka tuda depois sira halai mai iha ha’u nia uma nee hodi baku lampu rua rahun hotu no duni ami, ha’u nia katuas oan ho nia rian, sira atu baku mate maibé sira duni la toman,” Lourdes Torresão haktuir ba jornalista sira iha fatin akontesimentu.

Jornalista TATOLI ho GMN –TV to’o kedas iha Komandu PNTL Caicoli Dili hodi konfirma kazu ne’e ho Komandante Polisia Munisípiu Dili, Superintendente Xefe, Armando Monteiro, maibé seidauk bele fó komentáriu tanba sei kontinua iha prosesu investigasaun.

Informasaun  balun ne’ebé rekolla  husi fonte importante sira iha PNTL hateten, oan husi família ho inisiál A.J.S, iha Natal kalan, loron 24 fulan dezembru 2019 komete ona krime hodi taa joven ida iha nia oin ne’ebé momentu ne’e tuur hela ho família iha área Karantina Dili, no agora deskonfia repete tan kazu krime hanesan tanba taa membru F-FDTL Tome Lemos.

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here