Xefe Estadu FALINTIL-Forsa Defeza Timor-Leste (F-FDTL), Maiór Jenerál Lere Anan Timur, Imajen/Egas Cristovão

DILI, 15 jullu 2019 (TATOLI)-Grupu Ilegál lori katana taa kanek membru Forsa Espesiál FALINTIL-Forsa Defeza Timor-Leste (F-FDTL), Abílio Babo, hodi rezulta vítima nia hasan parte kuana kanek makas.

Kazu ne’e akontese iha área estrada parte Estasaun Kombustivel Nagarjo nian, iha area Bebonuk, Dili, domingu (14/07/2019), tuku 8:00 kalan, bainhira vítima uza ropa sivíl ho motór liuhusi área tasi ibun Pantai Kelapa atu ba nia uma.

Iha motor leten hela, derrepente telemovel lian no nia para iha dalan ninin hodi hasai kapasete simu telefone, maibé  derrepente grupu deskoñesidu, kompostu husi ema na’in lima (5) hakat ba serku no atake vítima hodi  taa vítima iha motór leten no monu ba rai.

Hafoin taa kanek vítima sira, suspeitu sira halai fahe malu ba ida-idak nia uma, nune’e sasin balun ne’ebé haree akontesimentu ne’e telefone kedas ba polisia Eskuadra Comoro no Polisia Militár (PM). Nune’e, liu minutu balun autoridade sira too kedas iha fatin akontesimentu hodi salva vítima no koordena ho sasin balun buka tuir ba kaer suspeitu na’in lima iha idak-idak nia uma iha parte Bebonuk.

Kazu ne’e kategoria fragante delitu (kaer ho liman) tanba polisia no Polisia Militár kaer suspeitu sira lori mós katana rua, tudik ida, rama ambon, inklui atributu grupu deskoñesidu sira ne’ebé Estadu Timor-Leste taka ona.

Suspeitu na’in lima agora detein hela iha sela Polisia Eskuadra Comoro submete ba investigasaun.

Xefe Estadu Maiór Jenerál FALINTIL Forsa Defeza Timor-Leste (F-FDTL), Majór Jenerál, Lere Anan Timur, lamentavél tebes ema sivíl liu –liu grupu deskoñesidu mak envolve direita taa kanek nia membru F-FDTL ne’e.

“Ha’u haree kazu ne’e depois ona, hodi kalan taa tan ha’u nia forsa espesiál ida kanek grave agora iha ospitál. Agora ita tenke toma medida, agora kaer ona sira nia na’in lima, ba oin sei kaer tan ne’ebé envolve too nia hun ne’ebé kombate krime ne’e,” afirma Lere Anan Timur, ohin, hodi responde jornalista sira iha Igreja Motaél, Dili.

Majór Jenerál Lere lamenta, ema sivíl sira kontinua ataka PNTL inklui F-FDTL nu’udar krime ida ne’ebé PNTL ho F-FDTL sei la tolera no sei kaer hotu autór sira ne’e.

Lere afirma tan, se grupu deskoñesidu  ne’ebé iha relasaun ho sira ne’ebé taka ona,  di’ak liu buka kria dame, tanba bainhira asalta  to’o taa forsa F-FDTL no PNTL ne’e konsidera krime organizadu.

Komandante Lere dehan, tuir planu iha tempu besik nia sei ko’alia ho Komandante Jerál PNTL atu halo atuasaun makas hasoru grupu deskoñesidu sira ne’e.

“PNTL no F-FDTL tenke halo atuasaun makas ona, ita labele admite iha Timór ne’e atu grupu deskoñesidu maka ukun fali, ne’e forsa rua ne’e ha’u hanoin la iha ona fatin. Ha’u sei reuniaun ho komandante polisia para ami haree situasaun sira ne’e,”  afirma Lere  Anan Timur.

Nia apela ba juventude sira ne’ebé envolve iha grupu deskoñesidu di’ak liu hakmatek iha uma halo serbisu ajuda inan aman sira. Tanba envolve iha grupu ilegál sei la fó benefísiu ba sira nia vida no futuru moris.

Jornalista Ajénsia TATOLI konfirmasaun kronolojia kazu ne’e ba Komandante Munisípiu Dili,  Superintendente Xefe, Armando Monteiro, maibé seidauk bele fó informasaun, tanba sei hein relatóriu investigasaun husi Komandu Eskuadra Comoro.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here