Ró Berlin Nakroma. Imajen Espesiál.

DILI, 23 dezembru 2019 (TATOLI) – Prezidente Konsellu Administrasaun Autoridade Portuáriu Timor-Leste (APORTIL, IP), Flávio Cardoso Neves, informa iha 2020 sei uza sistema dijitalizasaun ka online hodi fa’an billete Nakroma nian.

“Ita hakarak iha 2020, fan tíkete Nakroma liuhusi online atu fasilita sidadaun estranjeiru no timoroan ne’ebé viajen bá Oe-Cusse no Ataúro,” Prezidente APORTIL ba TATOLI hafoin enkontru ho Ministru Transporte no Komunikasaun iha Kaikoli, ohin.

Flávio Cardoso Neves adianta sei kria kooperasaun ho kompañia telekomunikasaun Telekomcel atubele fasilita sistema fa’an billete.

“Ita sei halo kooperasaun ho Telekomcel atubele hala’o sistema online ne’e”, katak.

Maibé, Prezidente APORTIL ne’e dehan sistema manuál mós sei kontinua uza atu fasilita mós populasaun balun ne’ebé sidauk bele utiliza sistema online.

Razaun uza sistema online, atubele fasilita no kria kondisaun hodi ema labele mai forma iha portu hodi sosa tíkete.

Entretantu, Flávio salienta Ministru Transporte no Komunikasaun (MTK) fó ona orientasaun ba APORTIL)atu promove timoroan sira sai tripulante ba ró Nakroma iha 2020.

“Hahú tinan oin ita tenta identifika ona fatin kuaze lima no neen de’it mak estranjeiru kontinua ka’er, maibé restu ne’e ita timoroan mak tenke jere”, katak.

Flávio Neves dehan daudaun kapitaun ho tripulante hamutuk 16 ne’e kuaze husi sidadaun Indonézia, ne’ebé iha tinan oin, timoroan na’in-12 komesa hala’o jestaun mós ba ró Nakroma.

“Ita mós tenke prepara ona ema timoroan atu sai kapitaun ró ba Nakroma II, ha’u hakarak timoroan rasik mak jere no lori, tanba ema timoroan mak hodi nia sentimentu nasionalizmu tanba lori nia ró rasik”, dehan.

Politikamente Governu Timor-Leste liuhusi MTK iha ona akordu (MoU, sigla inglés) ho Ministériu Transporte Indonézia atu implementa polítika formasaun no kapasitasaun ba timoroan sira, mas depende ba Orsamentu Jerál Estadu 2020.

Governu iha devér atu promove ona timoroan sira, hodi labele dada tali ró nia mós ema estranjeiru hotu no ba hamoos fatin iha ró laran de’it mós ema estranjeiru hotu.

Notísia relevante : Tenke Promove Timoroan Sai Tripulante ba Nakroma

28 Dezembru, Nakroma To’o ona Timor-Leste

Jornalista : Florencio Miranda Ximenes

Editora : Maria Auxiliadora

1 KOMENTÁRIU

  1. Assegura mós limpo iha ró laran tanba, laiha atensaun maksímu hosi equipa ró nian. Kada vez, passajeiru fuma no mama iha ró laran.

HAKEREK NO HATÁN

Please enter your comment!
Please enter your name here