Ró Berlin Nakroma. Imajen Espesiál.

DILI, 19 novembru 2019 (TATOLI) – Oitavu Governu liuhusi Ministériu Transporte no Komunikasaun (MTK) fó ona orientasaun ba Autoridade Portuária Timor-Leste (APORTIL) atu promove timoroan sira sai tripulante ba ró Nakroma iha 2020.

“Durante ne’e ita hatene ema estranjeiru (Indonéziu) de’it  mak halo jestaun  ba ita-nia ró Nakroma, ne’ebé hahú tinan oin (2020) ita tenta identifika ona fatin kuaze lima no neen de’it mak estranjeiru kontinua ka’er, maibé restu ne’e ita timoroan mak tenke jere”, Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, ba Tatoli iha Portu Dili, ohin.

Flávio Neves dehan daudaun kapitaun ho tripulante 16 ne’e kuaze sidadaun Indonézia, ne’ebé iha 2020, timoroan na’in-12 komesa hala’o jestaun mós ba ró Nakroma.

“Se ita la hahú ida ne’e, oinsá mak ita prepara ema tanba ita hahú sosa ona ró Nakroma II, atu sosa tan barikasa no grasa Deus ró haksolok mai tan, entaun ita iha ró más ema laiha atu jere”, katak.

Nune’e, Prezidente APORTIL ne’e adianta, hahú loke oportunidade ba joven sira ne’ebé atu hetan kapasitasaun ba área espesialidade tasi no kapitaun ró.

“Ita mós tenke prepara ona ema timoroan atu sai kapitaun ró ba Nakroma II, ha’u hakarak timoroan rasik mak jere no lori, tanba ema timoroan mak hodi nia sentimentu nasionalizmu tanba lori nia ró rasik”, dehan.

Politikamente Governu Timor-Leste liuhusi MTK asina ona akordu (MoU, sigla inglés) ho Ministériu Transporte Indonézia atu implementa polítika formasaun no kapasitasaun ba timoroan sira.

“Ha’u hanoin fin dezembru ita bele asina akordu implementasaun (APORTIL-Indonézia) atu nune’e tinan oin ita mós iha orsamentu ne’ebé prevee husi MTK atu komesa ona formasaun ba timoroan sira, la’ós formasaun de’it, maibé presiza estudu iha área espesialidade kedan”, afirma.

Objetivu husi formasaun ne’e, nia dehan atu promove ona timoroan sira, hodi labele dada tali ró nia mós ema estranjeiru hotu no ba hamoos fatin iha ró laran de’it mós ema estranjeiru hotu.

“Ha’u hanoin mekanizmu mak ne’e, ita timoroan presiza tama ona, ita tenke hahú uluk ho ró Nakroma no komesa promove ona timoroan atu sai na’in ba ró sira ne’ebé ita sosa”, hakotu.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here